By ភ្នំពេញ៖ ក្រសួងការពារជាតិបានបញ្ជាក់ថា នៅថ្ងៃទី១ ខែមេសា ឆ្នាំ២០២៦ លោកឧត្តមសេនីយ៍ឯក រ៉ាត់ ដារ៉ារ័ត្ន រដ្ឋលេខាធិការក្រសួងការពារជាតិ បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូនៃគណៈកម្មាធិការអន្តរជាតិនៃកាកបាទក្រហម (ICRC)។
កិច្ចជំនួបនេះដឹកនាំដោយលោកស្រី Dorsa NAZEMI SALMA ប្រធានគណៈកម្មាធិការអន្តរជាតិនៃកាកបាទក្រហមប្រចាំកម្ពុជា បានប្រព្រឹត្តទៅនៅទីស្តីការក្រសួងការពារជាតិ។ កិច្ចប្រជុំបានផ្តោតទៅលើការវិវត្តថ្មីៗដែលពាក់ព័ន្ធនឹងស្ថានភាពព្រំដែនកម្ពុជា-ថៃ និងកិច្ចការដែលគណៈប្រតិភូ ICRC បានធ្វើដំណើរទស្សនកិច្ចទៅតំបន់ព្រំដែន។
លោកឧត្តមសេនីយ៍ឯក រ៉ាត់ ដារ៉ារ័ត្ន បានសម្តែងនូវការថ្លែងអំណរគុណយ៉ាងជ្រាលជ្រៅដល់ ICRC ចំពោះការដើរតួនាទីយ៉ាងសំខាន់ក្នុងការជួយដោះស្រាយបញ្ហាជម្លោះព្រំដែនកម្ពុជា-ថៃ។ ជាពិសេស លោកបានលើកឡើងពីការជួយធ្វើមាតុភូមិនិវត្តន៍របស់កងទ័ពកម្ពុជាទាំង ១៨រូប ឱ្យត្រឡប់មកកាន់មាតុភូមិវិញដោយសុវត្ថិភាព។
កិច្ចជំនួបនេះបានបង្ហាញពីកិច្ចសហប្រតិបត្តិការដ៏ល្អរវាងរដ្ឋាភិបាលកម្ពុជា និងអង្គការអន្តរជាតិក្នុងការដោះស្រាយបញ្ហាព្រំដែន និងការពារសិទ្ធិមនុស្ស។
ក្រសួងការពារជាតិបានអះអាងថា កិច្ចសហការនេះនឹងបន្តដើម្បីធានាសន្តិសុខ និងស្ថិរភាពនៅតំបន់ព្រំដែន ដោយផ្តោតលើគោលការណ៍មនុស្សធម៌ និងការគោរពច្បាប់អន្តរជាតិ។
ដោយ៖ តារា
