សម្តេចឃួន សុដារី ប្រធានរដ្ឋសភា ថ្លែងថា ព្រំដែនកម្ពុជា-ឡាវ ជាបន្ទាត់សន្តិភាព និងការអភិវឌ្ឍ ដែលផ្តល់ឱកាសដល់ប្រទេសទាំងពីរ

ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា បានថ្លែងថា សុខសន្តិភាព និងស្ថិរភាពតាមបន្ទាត់ព្រំដែនកម្ពុជា-ឡាវ បានបង្កើតឱកាសដ៏ល្អប្រសើរសម្រាប់ការអភិវឌ្ឍប្រទេសទាំងពីរ។

ក្នុងឱកាសទទួលជួបសវនាការជាមួយគណៈប្រតិភូអាជ្ញាធរសវនកម្មជាតិឡាវ សម្តេចបានពន្យល់ថា ចំណងមិត្តភាពជាប្រពៃណី និងបងប្អូនរវាងប្រទេសទាំងពីរ បានផ្តល់អត្ថប្រយោជន៍យ៉ាងច្រើនដល់ការអភិវឌ្ឍ សុខសន្តិភាព និងស្ថិរភាពសម្រាប់ប្រជាពលរដ្ឋទាំងសងខាង។

សម្តេចបានគូសបញ្ជាក់ថា ប្រទេសទាំងពីរប្រៀបដូចជាដន្លងនឹងគ្នា ហើយតែងតែប្រកាន់ខ្ជាប់នូវទិសស្លោក «ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងនិរន្តរភាពយូរអង្វែង»។ នៅក្នុងស្ថានភាពពិភពលោកបច្ចុប្បន្ន ដែលហ៊ុំព័ទ្ធដោយសង្គ្រាម ចំណងមិត្តភាពនេះកាន់តែមានសារៈសំខាន់ជាងពេលណាទាំងអស់។

សម្តេចបានបញ្ជាក់ថា ថ្នាក់ដឹកនាំប្រទេសទាំងពីរបានឯកភាពគ្នាក្នុងការកសាងខ្សែបន្ទាត់ព្រំដែន ដែលសម្រេចបានស្ទើរតែទាំងស្រុង។ នេះជាបន្ទាត់ព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ដែលនឹងក្លាយជាមរតកសម្រាប់កូនចៅជំនាន់ក្រោយ។

សម្តេចមានជំនឿថា ក្រោមការប្តេជ្ញាចិត្តរបស់ថ្នាក់ដឹកនាំទាំងពីរ ចំណងមិត្តភាព និងកិច្ចសហប្រតិបត្តិការនឹងកាន់តែរឹងមាំ រីកចម្រើន និងឈានទៅសម្រេចបានទំហំពាណិជ្ជកម្ម ៧០០ លានដុល្លារនៅឆ្នាំ២០៣០។

ក្នុងស្ថានភាពលំបាកបច្ចុប្បន្ន សម្តេចបានអំពាវនាវឱ្យប្រែក្លាយ «ការប្រឈមឱ្យទៅជាឱកាស» ពង្រឹងឯកភាព និងសាមគ្គីជាតិឱ្យបានរឹងមាំ។ រាជរដ្ឋាភិបាលកម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត មានចក្ខុវិស័យច្បាស់លាស់ក្នុងការដោះស្រាយបញ្ហាប្រឈម និងអភិវឌ្ឍប្រទេសជាតិ។

លោក វៀងថាវិសុន ទេពផាច័ន្ទ អគ្គសវនករអាជ្ញាធរសវនកម្មជាតិឡាវ បានអញ្ជើញជួបសម្តេចប្រធានរដ្ឋសភា នៅព្រឹកថ្ងៃទី១ មេសា ២០២៦។ លោកបានវាយតម្លៃខ្ពស់ចំពោះវឌ្ឍភាពរបស់កម្ពុជាលើគ្រប់វិស័យ រួមមានអាកាសយានដ្ឋានអន្តរជាតិតេជោ ហេដ្ឋារចនាសម្ព័ន្ធសង្គម និងសំណង់អគារផ្សេងៗ។

សម្តេចបានលើកឡើងថា សវនកម្មមានតួនាទីសំខាន់ក្នុងការចូលរួមកសាងប្រទេសជាតិ ជាពិសេសក្នុងការធានាអភិបាលកិច្ចល្អ តម្លាភាព គណនេយ្យភាព និងភាពធន់។ ស្ថាប័នសវនកម្មរឹងមាំគឺជាសសរស្តម្ភសំខាន់សម្រាប់ការអភិវឌ្ឍប្រកបដោយចីរភាព។

កម្ពុជា និងឡាវ មិនត្រឹមតែជាអ្នកជិតខាងល្អ និងបងប្អូនប៉ុណ្ណោះទេ ថែមទាំងជាសមាជិកអាស៊ានដ៏សំខាន់។ សាមគ្គីភាព និងការគោរពមជ្ឈភាពអាស៊ាន ជាកត្តាសំខាន់ដែលធ្វើឱ្យអាស៊ានអាចរក្សាសន្តិភាព និងសុខដុមរមនាសម្រាប់ប្រជាជនក្នុងតំបន់បាន។

ដោយ៖ សិលា