By ផលិតកម្មប្រេងរបស់អង្គការ OPEC បានធ្លាក់ចុះដល់កម្រិតទាបបំផុតចាប់តាំងពីវិបត្តិកូវីដ-១៩ ដោយសារតែជម្លោះនៅតំបន់មជ្ឈិមបូព៌ា ដែលបានរំខានដល់ការនាំចេញប្រេងតាមច្រកសមុទ្រហ័រមូហ្ស។
យោងតាមការស្រាវជ្រាវរបស់ទីភ្នាក់ងារសារព័ត៌មានរ៉យទ័រ ផលិតកម្មប្រេងឆៅរបស់សមាជិក OPEC សរុបបានធ្លាក់ចុះប្រមាណ ៧,៣ លានបារ៉ែលក្នុងមួយថ្ងៃ មកនៅត្រឹម ២១,៥៧ លានបារ៉ែលក្នុងមួយថ្ងៃនៅខែមីនា។ ការធ្លាក់ចុះយ៉ាងគំហុកនេះ ភាគច្រើនបណ្តាលមកពីការកាត់បន្ថយផលិតកម្មនៅប្រទេសគុយវ៉ែត អ៊ីរ៉ាក់ អារ៉ាប៊ីសាអូឌីត និងអារ៉ាប់រួម។
ប្រទេសអ៊ីរ៉ាក់ជាប្រទេសដែលកត់ត្រាការធ្លាក់ចុះផលិតកម្មច្រើនជាងគេ ដោយធ្លាក់ពី ៤,១៥ លានបារ៉ែលក្នុងមួយថ្ងៃនៅខែកុម្ភៈ មកត្រឹម ១,៤ លានបារ៉ែលក្នុងមួយថ្ងៃនៅខែមីនា។
ការធ្លាក់ចុះផលិតកម្មនេះ កើតឡើងទៅពីការជាប់គាំងនៅច្រកសមុទ្រហ័រមូហ្ស ដែលជាច្រកសមុទ្រសំខាន់សម្រាប់ការនាំចេញប្រេងពីតំបន់មជ្ឈិមបូព៌ា។ ទោះបីជាអារ៉ាប៊ីសាអូឌីត និងអារ៉ាប់រួមមានផ្លូវនាំចេញជំនួសក៏ដោយ ក៏ពួកគេក៏បានកាត់បន្ថយផលិតកម្មដែរ ប៉ុន្តែក្នុងបរិមាណតិចជាង។
ផលិតកម្មសរុប ២១,៥៧ លានបារ៉ែលក្នុងមួយថ្ងៃនេះ គឺជាកម្រិតទាបបំផុតចាប់តាំងពីខែមិថុនា ឆ្នាំ២០២០។ អ្នកវិភាគព្រមានថា តួលេខនេះអាចនឹងធ្លាក់ចុះទៀត ដោយសារការរំខានផ្នែកផ្គត់ផ្គង់បន្តបន្ទាប់ពីជម្លោះនៅតំបន់។
ការស្រាវជ្រាវនេះផ្អែកលើទិន្នន័យពីក្រុមហ៊ុនហិរញ្ញវត្ថុ LSEG និងព័ត៌មានពីក្រុមហ៊ុនតាមដានលំហូរប្រេងដូចជា Kpler រួមជាមួយនឹងប្រភពពីក្រុមហ៊ុនប្រេង និងអ្នកប្រឹក្សាយោបល់។
