By ភ្នំពេញ៖ ក្រសួងមហាផ្ទៃបានចេញរបាយការណ៍ថា ក្នុងខែមីនា ឆ្នាំ២០២៦ បានកើតគ្រោះថ្នាក់ចរាចរណ៍ផ្លូវគោកសរុប ១៨៤ ករណី ដែលបណ្ដាលឱ្យមានអ្នកស្លាប់ ១០៧ នាក់ និងរបួស ២៥៧ នាក់។
បើធៀបនឹងខែកុម្ភៈ គ្រោះថ្នាក់ចរាចរណ៍ខែមីនាបានថយចុះ ១៨ ករណី អ្នកស្លាប់ថយចុះ ៦៣ នាក់ និងអ្នករបួសថយចុះ ១៦០ នាក់។ ទោះជាយ៉ាងណា ក្រសួងនៅតែចាត់ទុកគ្រោះថ្នាក់ចរាចរណ៍ជាបញ្ហាប្រឈមខ្ពស់ ដោយសារករណីគ្រោះថ្នាក់ដែលបណ្ដាលឱ្យមានអ្នកស្លាប់ច្រើនក្នុងករណីតែមួយនៅតែកើតឡើងជាញឹកញាប់។
លោក អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអំពាវនាវឱ្យអ្នកប្រើប្រាស់ផ្លូវទាំងអស់ភ្ញាក់រលឹក និងគោរពច្បាប់ចរាចរណ៍ឱ្យបានខ្ជាប់ខ្ជួន។ លោកបានសង្កត់ធ្ងន់ថា ការគោរពច្បាប់ចរាចរណ៍គឺជាកាតព្វកិច្ចមនសិការដើម្បីការពារអាយុជីវិតខ្លួនឯង គ្រួសារ និងសេចក្ដីសុខសាន្តរបស់សង្គម។
សមត្ថកិច្ចនឹងបន្តអនុវត្តគោលការណ៍អប់រំ និងផាកពិន័យចំពោះអ្នកបើកបរដែលមានជាតិស្រវឹង និងរំលោភលើច្បាប់ចរាចរណ៍។ ការងារកាត់បន្ថយគ្រោះថ្នាក់ចរាចរណ៍ត្រូវការការចូលរួមពីអ្នកប្រើប្រាស់ផ្លូវទាំងអស់។
ដោយ៖ លោក សេង បូលីន មន្ត្រីអ្នកនាំពាក្យក្រសួងមហាផ្ទៃ
