By ខេត្តកណ្តាល – កាលពីព្រឹកថ្ងៃទី២ មេសា ឆ្នាំ២០២៦ អាជ្ញាធរនគរបាលក្រុងតាខ្មៅបានឱ្យដឹងពីរឿងគួរឱ្យស្តាយមួយ ដែលក្រុមបច្ចេកទេសមន្ទីរសាធារណការ និងដឹកជញ្ជូនខេត្តកណ្តាលកំពុងខំប្រឹងជួសជុលអំពូលភ្លើងផ្លូវដែលដាច់ បែរជាមានបងប្អូនពីរនាក់លួចកាត់ខ្សែភ្លើងទាំងនោះយកទៅលក់ ដើម្បីទិញថ្នាំញៀនប្រើប្រាស់។
ហេតុការណ៍នេះបានកើតឡើងនៅម៉ោង៦ល្ងាចថ្ងៃទី២៨ មីនា ឆ្នាំ២០២៦ នៅស្ពានអាកាសមហាវិថីស៊ីជីងពីង ភូមិទួលក្រសាំង សង្កាត់រកាខ្ពស់ ក្រុងតាខ្មៅ។ សមត្ថកិច្ចបានឃាត់ខ្លួនជនសង្ស័យទាំងពីរនាក់បាននៅថ្ងៃទី០១ មេសា។
លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅបានបញ្ជាក់ថា ជនសង្ស័យទាំងពីរជាបងប្អូនគ្នា៖ ឈ្មោះ ប៊ុននី អាយុ២៦ឆ្នាំ (ប្អូន) និង វីវជិប អាយុ៣៩ឆ្នាំ (បង)។ ជនទាំងពីរមានលទ្ធផលវិជ្ជមាននូវសារធាតុញៀន គ្មានមុខរបរច្បាស់លាស់ និងរស់នៅក្នុងតំបន់កើតហេតុ។
ការខូចខាតដែលកើតឡើងមានខ្សែភ្លើងជាច្រើនម៉ែត្រ បង្គោលភ្លើងខូច និងប្រអប់ភ្លើងខូច ធ្វើឱ្យផ្លូវងងឹតនៅពេលយប់ ប៉ះពាល់ដល់យានយន្តធ្វើដំណើរ។ សមត្ថកិច្ចបានចាប់យកកន្ត្រៃដែកចំនួន១ជាភស្តុតាង។
តាមការសារភាពរបស់ជនសង្ស័យ ពួកគេបានយកកន្ត្រៃដែកកាត់ខ្សែភ្លើងតាមបង្គោលភ្លើងផ្លូវ យកទៅលក់បានលុយ៤,០០០រៀលទៅ៥,០០០រៀល ហើយយកលុយនោះទៅទិញថ្នាំញៀនប្រើប្រាស់។
បច្ចុប្បន្ន ជនសង្ស័យទាំងពីរត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងតាខ្មៅ។ ក្រុមបច្ចេកទេសមន្ទីរសាធារណការកំពុងខំជួសជុលអំពូលភ្លើងចំនួន១២៧បង្គោល ដើម្បីឱ្យភ្លឺឡើងវិញមុនពិធីបុណ្យចូលឆ្នាំថ្មីខាងមុខ។
