By តម្លៃប្រេងអន្តរជាតិបន្តប្រែប្រួលខ្លាំងនៅដើមខែមេសា បន្ទាប់ពីតម្លៃប្រេង Brent កើនឡើងជិតដល់ ១២០ ដុល្លារ/បារ៉ែល និងបំបែកកំណត់ត្រាខ្ពស់បំផុត ដោយសារភាពតានតឹងកើនឡើងនៃជម្លោះមជ្ឈិមបូព៌ា។
តម្លៃប្រេងម៉ាក Brent សម្រាប់កុងត្រាខែឧសភា ដែលត្រូវផុតកំណត់កាលពីថ្ងៃអង្គារ បានកើនឡើងដល់ ១១៨,៣៥ ដុល្លារ/បារ៉ែល។ តម្លៃប្រេងម៉ាកនេះបានកើនខ្ពស់រហូតដល់ទៅ ៦៤% កាលពីខែមីនា។
វិនិយោគិនឥឡូវនេះងាកទៅកាន់កុងត្រាខែមិថុនា ដែលឆ្លុះបញ្ជាំងពីស្ថានភាពទីផ្សារជាក់ស្ដែង។ តម្លៃប្រេង Brent សម្រាប់កុងត្រាខែមិថុនា បានកើនឡើងបន្តិចដល់ប្រហែល ១០៤ ដុល្លារ/បារ៉ែល សម្រាប់ការជួញដូរលើទីផ្សារអាស៊ី។
អ្នកវិភាគនៅតែយល់ឃើញថា ទីផ្សារប្រេងបច្ចុប្បន្ននៅតែបន្តប្រែប្រួលខ្លាំង ដោយកើនឡើង ឬចុះអាស្រ័យទៅលើការវិវត្តប្រចាំថ្ងៃនៃជម្លោះមជ្ឈិមបូព៌ា។
ទោះបីជាមានរបាយការណ៍ថា ប្រធានាធិបតីអ៊ីរ៉ង់លោក Masoud Pezeshkian អាចនឹងបើកចំហចំពោះការបញ្ចប់ជម្លោះ ក៏វិនិយោគិននៅតែមានការប្រុងប្រយ័ត្ន។
អ្នកវិភាគកត់សម្គាល់ថា កង្វះវឌ្ឍនភាពការទូតជាក់ស្តែង ការបន្តការវាយប្រហារតាមសមុទ្រ រួមទាំងការបិទច្រកសមុទ្រហ័រមូហ្ស និងការគំរាមកំហែងដល់ហេដ្ឋារចនាសម្ព័ន្ធថាមពល នៅតែបន្តបង្កហានិភ័យផ្គត់ផ្គង់យ៉ាងសំខាន់ដល់ទីផ្សារប្រេងសកល។
ទន្ទឹមនឹងនេះ ផលិតកម្មប្រេងរបស់ OPEC បានធ្លាក់ចុះយ៉ាងខ្លាំងនៅក្នុងខែមីនា ដែលបង្ហាញពីទំហំនៃការរំខានដែលបណ្តាលមកពីជម្លោះ។ ការរួមបញ្ចូលគ្នានៃការផ្គត់ផ្គង់ដែលថយចុះ និងអស្ថិរភាពភូមិសាស្ត្រនយោបាយ បាននាំឱ្យអ្នកវិភាគបង្កើនការព្យាករតម្លៃប្រេងសម្រាប់ឆ្នាំ ២០២៦។
