ចិនរិះគន់ខ្លាំងក្រោយជប៉ុនដាក់ពង្រាយមីស៊ីលវាយប្រហារឆ្ងាយ ដែលអាចឈានដល់ទឹកដីចិន

ក្រសួងការបរទេសចិនបានសម្តែងការព្រួយបារម្ភយ៉ាងខ្លាំងក្រោយជប៉ុនដាក់ពង្រាយមីស៊ីលរយៈចម្ងាយឆ្ងាយដែលមានសមត្ថភាពវាយប្រហារគោលដៅឆ្ងាយ ដោយទីក្រុងតូក្យូហៅថា “មូលដ្ឋានសត្រូវ”។

យោងតាម Chinadaily ផ្សាយថ្ងៃទី០២ ខែមេសា ប្រទេសជប៉ុនបានប្រកាសនៅថ្ងៃអង្គារពីការដាក់ពង្រាយមីស៊ីលរយៈចម្ងាយឆ្ងាយក្នុងខេត្ត Kumamoto និង Shizuoka ក្រោមហេតុផលសន្តិសុខជាតិ និងពង្រឹងសមត្ថភាពនៅតាមតំបន់ងាយរងគ្រោះ។

អ្នកនាំពាក្យក្រសួងការបរទេសចិន លោកស្រី Mao Ning បានលើកឡើងនៅថ្ងៃពុធថា៖ «ការដាក់ពង្រាយអាវុធវាយលុករបស់ជប៉ុនក្រោមលេសនៃការការពារខ្លួន គឺលើសពីវិសាលភាពនៃការការពារខ្លួននិងការពារផ្តាច់មុខឆ្ងាយណាស់»។

លោកស្រីបន្តថា៖ «រឿងនេះរំលោភលើបទប្បញ្ញត្តិយ៉ាងធ្ងន់ធ្ងរដែលមានកម្លាំងចងភ្ជាប់នៃច្បាប់អន្តរជាតិ ដូចជាសេចក្តីប្រការទីក្រុង Cairo ទីក្រុង Potsdam និងឧបករណ៍ដែលមិនយកមកប្រើប្រាស់របស់ជប៉ុន។ វាជាការរំលោភលើរដ្ឋធម្មនុញ្ញជប៉ុនយ៉ាងធ្ងន់ធ្ងរ និងបទដ្ឋានក្នុងស្រុកដែលមានស្រាប់របស់ខ្លួន»។

លោកស្រី Mao បន្ថែមថា៖ «បញ្ហានេះបង្ហាញម្តងទៀតថា កងកម្លាំងស្តាំនិយមរបស់ជប៉ុនកំពុងជំរុញគោលនយោបាយសន្តិសុខឆ្ពោះទៅរកការវាយលុក និងការពង្រីកខ្លួន»។

យោងតាមភ្នាក់ងារ AP មីស៊ីលប្រភេទ Type-១២ អាចបាញ់បានរយៈចម្ងាយជាង ១០០០ គីឡូម៉ែត្រ ដែលជាការពង្រីកពីចម្ងាយ ២០០គីឡូម៉ែត្រនៃមីស៊ីលដើម អនុញ្ញាតឱ្យមីស៊ីលនេះមានសមត្ថភាពហោះទៅដល់ដីគោករបស់ប្រទេសចិន។

លោកស្រី Mao លើកឡើងទៀតថា៖ «យោធានិយមថ្មីរបស់ជប៉ុនកំពុងគំរាមកំហែងដល់សន្តិភាព និងស្ថិរភាពនៅក្នុងតំបន់។ សហគមន៍អន្តរជាតិគួរតែប្រុងប្រយ័ត្នខ្ពស់។ ខ្ញុំក៏បានកត់សម្គាល់ឃើញថា អង្គការ និងពលរដ្ឋជប៉ុនជាច្រើនបង្ហាញយ៉ាងច្បាស់ពីការជំទាស់របស់ពួកគេលើការដាក់ពង្រាយមីស៊ីលនេះ»។

អ្នកនាំពាក្យប្រទេសចិនរូបនេះបន្តថា៖ «យើងសូមអំពាវនាវ ដល់ភាគីជប៉ុនឱ្យឆ្លុះបញ្ចាំងយ៉ាងស៊ីជម្រៅពីប្រវត្តិសាស្ត្រនៃការឈ្លានពានយោធានិយម ដែលបំពេញតាមការប្តេជ្ញាចិត្តរបស់ខ្លួនក្នុងវិស័យសន្តិសុខយោធានិងធ្វើសកម្មភាពដោយប្រយ័ត្នប្រយែងបំផុត»។