By ថ្ងៃនេះជាថ្ងៃប្រវត្តិសាស្ត្រសម្រាប់វិស័យអវកាសអាមេរិក! NASA បានចាប់ផ្ដើមបេសកកម្ម Artemis II ដ៏គួរឱ្យចាប់អារម្មណ៍ ដោយបាញ់បង្ហោះអវកាសយានិក៤នាក់ទៅកាន់ព្រះចន្ទនៅថ្ងៃទី០១ ខែមេសា។ បេសកកម្មនេះជាការត្រឡប់មកវិញរបស់មនុស្សទៅព្រះចន្ទក្រោយពីជាង៥០ឆ្នាំ។
យោងតាមការផ្សាយពី FirstPost បេសកកម្ម Artemis II ជាបេសកកម្មដំបូងរបស់ NASA ដែលមានមនុស្សជិះទៅព្រះចន្ទក្រោយពីជាងប្រាំទសវត្សរ៍។ បេសកកម្មនេះត្រូវបានរចនាឡើងដើម្បីរៀបចំផ្លូវសម្រាប់បេសកកម្មនាពេលអនាគត ជាពិសេសការបញ្ជូនអវកាសយានិកទៅកាន់ផ្ទៃព្រះចន្ទនៅពេលក្រោយៗទៀត។
ក្រុមអវកាសយានិកទាំង៤នាក់នឹងធ្វើដំណើរជុំវិញព្រះចន្ទ និងត្រឡប់មកវិញក្នុងរយៈពេល១០ថ្ងៃ។ នេះជាដំណាក់ការសំខាន់មុនការចុះចតលើផ្ទៃព្រះចន្ទនៅក្នុងបេសកកម្ម Artemis III នាពេលខាងមុខ។
យានអវកាស Artemis II ត្រូវបានបាញ់បង្ហោះចេញពីមជ្ឈមណ្ឌលអវកាស Kennedy របស់ NASA ក្នុងរដ្ឋ Florida ដោយប្រើប្រព័ន្ធបាញ់បង្ហោះ Space Launch System (SLS) ដែលជារ៉ុក្កែតដ៏មានឥទ្ធិពលបំផុតដែល NASA ធ្លាប់បានបង្កើត។
ក្នុងថ្ងៃដំបូង១-២ថ្ងៃ ក្រុមអវកាសយានិកនឹងចំណាយពេលក្នុងគន្លងផែនដីខ្ពស់ ដោយធ្វើការត្រួតពិនិត្យប្រព័ន្ធទាំងអស់។ បន្ទាប់មក យាន Orion នឹងអនុវត្តការដុតម៉ាស៊ីនសំខាន់ ដែលគេស្គាល់ថាជា «ការចាក់បញ្ចូលតាមចន្ទគតិ» ដើម្បីចាកចេញពីគន្លងផែនដីទៅកាន់ព្រះចន្ទ។
ក្នុងថ្ងៃទី៣-៤ យានអវកាសនឹងធ្វើដំណើរឆ្ពោះទៅកាន់ព្រះចន្ទ ហើយនឹងឆ្លងកាត់ក្រោយព្រះចន្ទលើគន្លងដែលនឹងបង្វិលវាត្រឡប់មកផែនដីវិញដោយធម្មជាតិ។ នៅពេលនេះ យានអវកាសនឹងទៅដល់ចម្ងាយឆ្ងាយបំផុតពីផែនដី។
ក្នុងថ្ងៃទី៥-៨ ក្រុមអវកាសយានិកនឹងធ្វើដំណើរត្រឡប់មកផែនដីវិញ។ នៅពេលយាន Orion ខិតជិតផែនដី វានឹងធ្លាក់ចូលទៅក្នុងបរិយាកាសក្នុងល្បឿនជាង៤០,២៣៣គីឡូម៉ែត្រក្នុងមួយម៉ោង មុនពេលធ្លាក់ចូលទៅក្នុងមហាសមុទ្រប៉ាស៊ីហ្វិក។
គួរបញ្ជាក់ថា NASA បានបាញ់បង្ហោះបេសកកម្ម Artemis I ដែលគ្មានមនុស្សជិះទៅកាន់ព្រះចន្ទក្នុងឆ្នាំ២០២២ ដើម្បីសាកល្បងប្រព័ន្ធទាំងអស់មុនបេសកកម្មដែលមានមនុស្សជិះនេះ។
