By កម្លាំងសមត្ថកិច្ចក្រុងតាខ្មៅបានឃាត់ខ្លួនជនសង្ស័យចំនួន២នាក់ ក្រោយពីប្រជាពលរដ្ឋរាយការណ៍អំពីករណីលួចកាត់ខ្សែភ្លើងតាមផ្លូវសាធារណៈនៅភូមិទួលក្រសាំង សង្កាត់រកាខ្ពស់។
ដោយអនុវត្តតាមបទបញ្ជារបស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានបញ្ជាអោយកម្លាំងជំនាញធ្វើការស្រាវជ្រាវឃាត់ខ្លួនជនសង្ស័យទាំងពីរ។
ជនសង្ស័យឈ្មោះ ថា ប៊ុននី ហៅឃ្នី អាយុ២៦ឆ្នាំ និង វីវះជិប អាយុ៣៩ឆ្នាំ ទាំងពីរជាប្រុស មុខរបរមិនពិតប្រាកដ មានទីលំនៅនៅសង្កាត់រកាខ្ពស់។ ពួកគេត្រូវបានគេរកឃើញមានសារធាតុញៀនផងដែរ។
តាមការសារភាព ជនសង្ស័យបានទទួលស្គាល់ថា ពួកគេបានយកកន្ត្រៃដែកកាត់ខ្សែបង្គោលភ្លើង ហើយយកទៅលក់បានលុយ៤,០០០រៀល ទៅ៥,០០០រៀល ដើម្បីទិញថ្នាំញៀនមកជក់។
បច្ចុប្បន្ន ជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងតាខ្មៅ ដើម្បីបញ្ជូនទៅតុលាការចាត់ការតាមច្បាប់។
