By ខេត្តបាត់ដំបង៖ អយ្យការអមសាលាដំបូងខេត្តបាត់ដំបង បានចោទប្រកាន់យុវជនឈ្មោះ ស៊ីវ ជ័យសិដ្ឋ អាយុ ២០ឆ្នាំ ពីបទបើកបរដោយធ្វេសប្រហែស និងរត់គេចខ្លួន បន្ទាប់ពីបង្កគ្រោះថ្នាក់ចរាចរណ៍ធ្ងន់ ដែលធ្វើឱ្យមនុស្សស្លាប់ ៥ នាក់ ក្នុងនោះមានស្ត្រីម្នាក់មានគភ៌ ៣ខែ។
គ្រោះថ្នាក់ចរាចរណ៍នេះបានកើតឡើងនៅយប់ថ្ងៃទី២៧ ខែមីនា ឆ្នាំ២០២៦ វេលាម៉ោងប្រហែល ២២:៤០នាទី នៅត្រង់ចំណុចបង្គោលគីឡូម៉ែត្រលេខ ២៤៦-២៤៧ លើផ្លូវជាតិលេខ៥ ក្នុងភូមិកកោះ ស្រុកមោងឬស្សី។ យុវជនបានបើករថយន្តម៉ាក MERCEDES BENZ AMG GT៥៣ ពណ៌ខ្មៅ ឆ្នាំ២០២០ ពាក់ផ្លាកលេខ C.S.៦១៦៨ ក្នុងល្បឿនលឿន ហើយបានបុកចំពីខាងក្រោយម៉ូតូចំនួនពីរគ្រឿង។
ជនរងគ្រោះទាំងអស់ជាអ្នកភូមិកកោះ ដែលកំពុងវិលត្រឡប់មកពីមើលការប្រគុំតន្ត្រីនៅទីរួមស្រុកមោងឬស្សី។ ក្រោយកើតហេតុ អ្នកបើករថយន្តបានរត់គេចខ្លួន បន្សល់ទុករថយន្តនៅទីកើតហេតុ។
តំណាងអយ្យការបានបំបែកសំណុំរឿងជា២ផ្នែក៖ ផ្នែកទី១ស្តីពីបទបើកបរដោយធ្វេសប្រហែសបណ្តាលឱ្យស្លាប់ ៥នាក់ តាមមាត្រា៨៥ ច្បាប់ចរាចរ។ ផ្នែកទី២ស្តីពីបទបើកបរដោយធ្វេសប្រហែសបណ្តាលឱ្យរបួសធ្ងន់ ១នាក់ និងបទរត់គេចខ្លួនតាមមាត្រា៥៤៣ ក្រមព្រហ្មទណ្ឌ។
សំណុំរឿងទាំងពីរត្រូវបានបញ្ជូនទៅចៅក្រមស៊ើបសួរសាលាដំបូងខេត្តបាត់ដំបង ដើម្បីចាត់ការបន្តតាមនីតិវិធីច្បាប់។ ក្មេងប្រុសម្នាក់ដែលរងរបួសធ្ងន់កំពុងសម្រាកព្យាបាលនៅមន្ទីរពេទ្យ។
អយ្យការបានចេញដីកាសន្និដ្ឋានបញ្ជូនរឿងលេខ២៥៦ និង២៥៨ ចុះថ្ងៃទី២ ខែមេសា ឆ្នាំ២០២៦ ដើម្បីដាក់ពាក្យបណ្តឹងទៅតុលាការ។
