By ទីក្រុងគូឡាឡាំពួ៖ អាជ្ញាធរគយម៉ាឡេស៊ីបានប្រកាសពង្រឹងការអនុវត្តច្បាប់ហាមឃាត់ទាំងស្រុងលើការនាំចូលសំណល់អេឡិចត្រូនិក ចាប់ពីថ្ងៃទី១ ខែមេសា ឆ្នាំ២០២៦ នេះតទៅ។
សំណល់អេឡិចត្រូនិក ឬ E-waste រួមមានឧបករណ៍អេឡិចត្រូនិកដែលត្រូវបានបោះចោល ដូចជាទូរសព្ទដៃ កុំព្យូទ័រ ទូរទស្សន៍ ថ្ម និងឧបករណ៍ប្រើប្រាស់ផ្សេងៗទៀត។ ក្នុងមួយឆ្នាំៗ ពិភពលោកផលិតសំណល់ទាំងនេះរាប់សិបលានតោន ដែលអាចបញ្ចេញលោហធាតុធ្ងន់ និងសារធាតុគីមីគ្រោះថ្នាក់ដល់សុខភាពមនុស្ស។
លោក Amran Ahmad អគ្គនាយកគយម៉ាឡេស៊ីបានបញ្ជាក់ថា៖ “ចាប់ពីថ្ងៃទី១ មេសា ការនាំចូលសំណល់អេឡិចត្រូនិកទាំងអស់នឹងត្រូវបានហាមឃាត់ដាច់ខាត នៅគ្រប់ច្រកព្រំដែនទាំងអស់។”
តាមការប៉ាន់ស្មានរបស់ស្ថាប័ន Basel Action Network មានសំណល់អេឡិចត្រូនិកជាង ៧,៥០០ កុងតឺន័រ ត្រូវបាននាំចូលមកម៉ាឡេស៊ីពីសហរដ្ឋអាមេរិក ក្នុងរយៈពេលពីខែមករា ២០២៣ ដល់ខែកុម្ភៈ ២០២៥។
អាជ្ញាធរម៉ាឡេស៊ីបានទទួលជោគជ័យក្នុងការស្ទាក់រឹបអូសសំណល់អេឡិចត្រូនិកចំនួន ២៤២ តោន កាលពីថ្ងៃទី៣០ មីនា នៅកំពង់ផែ Klang ដែលជាកំពង់ផែធំជាងគេនិងមមាញឹកបំផុតរបស់ប្រទេស។
ការហាមឃាត់ថ្មីនេះមកបន្ទាប់ពីការសម្រេចចិត្តរបស់អាជ្ញាធរម៉ាឡេស៊ីកាលពីខែកុម្ភៈ ដើម្បីទប់ស្កាត់ការនាំចូលដោយខុសច្បាប់ ដែលកំពុងបង្កផលប៉ះពាល់ធ្ងន់ធ្ងរដល់បរិស្ថាន និងសុខភាពប្រជាពលរដ្ឋ។
