ថៃរៀបចំលុបចោល MoU 44 ព្រំដែនសមុទ្រជាមួយកម្ពុជា ដាក់ជូនសភាពិភាក្សានៅសប្ដាហ៍នេះ

ភ្នំពេញ – នាយករដ្ឋមន្ត្រីថៃ លោក អានុទិន ចាន់វីរៈកុល បានប្រកាសថា រដ្ឋាភិបាលថៃនឹងដាក់ការលុបចោលអនុស្សរណៈនៃការយោគយល់គ្នាឆ្នាំ២០០១ (MoU 44) ស្ដីពីតំបន់សមុទ្រដែលទាមទារត្រួតស៊ីគ្នាជាមួយកម្ពុជា ទៅក្នុងសេចក្ដីថ្លែងការណ៍នយោបាយដាក់ជូនសភា។

យោងតាមកាសែតបាងកកប៉ុស្ដិ៍ ដែលចុះផ្សាយនៅថ្ងៃព្រហស្បតិ៍ទី២ ខែមេសា ឆ្នាំ២០២៦ លោកនាយករដ្ឋមន្ត្រីបានប្រកាសកាលពីថ្ងៃពុធថា ការលុបចោល MoU 44 នេះនឹងត្រូវបញ្ចូលទៅក្នុងសេចក្ដីថ្លែងការណ៍នយោបាយដែលជិតរួចរាល់ហើយ។

សេចក្ដីថ្លែងការណ៍នេះរំពឹងថានឹងត្រូវដាក់ជូនសភានៅក្នុងសប្ដាហ៍នេះ ដើម្បីធ្វើការពិភាក្សាដេញដោល។ ខណៈ MoU 44 ត្រូវបានកំណត់ថាត្រូវលុបចោល លោកនាយករដ្ឋមន្ត្រីបានកត់សម្គាល់ថា MoU 43 ដែលជាកិច្ចព្រមព្រៀងព្រំដែនគោកឆ្នាំ២០០០ នៅតែស្ថិតក្រោមការពិចារណានៅឡើយ។

MoU 43 ផ្ដោតសំខាន់លើការកំណត់ព្រំដែនគោក និងការបោះបង្គោលព្រំដែនរវាងកម្ពុជា និងថៃ តាមរយៈគណៈកម្មការចម្រុះព្រំដែន (JBC)។ ចំណែកឯ MoU 44 គឺជាក្របខ័ណ្ឌសម្រាប់ដោះស្រាយតំបន់សមុទ្រដែលទាមទារត្រួតគ្នា (OCA) ក្នុងឈូងសមុទ្រថៃ។

កិច្ចព្រមព្រៀងនេះមានគោលបំណងបើកផ្លូវឲ្យមានការចរចាបែងចែកផលប្រយោជន៍ថាមពល ប្រេង និងឧស្ម័នធម្មជាតិ រួមទាំងការកំណត់បន្ទាត់ព្រំដែនសមុទ្ររវាងប្រទេសទាំងពីរ។

ការលុបចោល MoU 44 នេះបង្ហាញពីការផ្លាស់ប្ដូរទស្សនៈរបស់រដ្ឋាភិបាលថៃថ្មីក្នុងការដោះស្រាយបញ្ហាព្រំដែនសមុទ្រជាមួយកម្ពុជា ដែលធ្លាប់មានជម្លោះជាយូរឆ្នាំមកហើយ។