By កម្លាំងនគរបាលប៉ុស្តិ៍រដ្ឋបាលវាលវង់ នៃអធិការដ្ឋាននគរបាលខណ្ឌ ៧ មករា បានអញ្ជើញសន្តិសុខយាមម្នាក់មកធ្វើកិច្ចសន្យានិងអប់រំ ក្រោយគេឃើញវីដេអូរូបនេះធ្វើសកម្មភាពបំផ្លាញទ្រព្យសម្បត្តិអ្នកដទៃលើផ្លូវសាធារណៈ។
ព្រឹត្តិការណ៍នេះកើតឡើងកាលពីថ្ងៃទី ២ ខែមេសា ឆ្នាំ ២០២៦ នៅកំណាត់ផ្លូវលេខ ២១៣ សង្កាត់វាលវង់ ខណ្ឌ ៧ មករា។ តាមវីដេអូដែលបានចាក់ផ្សាយនៅលើបណ្ដាញសង្គម ឃើញសន្តិសុខយាមនៅសាលារៀនឯកជនម្នាក់ បានធាក់កញ្ចក់រថយន្តដែលចតនៅលើចិញ្ចើមផ្លូវ។
លោកវរសេនីយ៍ឯក ជុន ប៊ុនណាន អធិការនគរបាលខណ្ឌ ៧ មករា បានឲ្យដឹងថា៖ “សកម្មភាពនេះជាការបំផ្លាញទ្រព្យសម្បត្តិអ្នកដទៃ ទោះបីជនរងគ្រោះមិនដាក់ពាក្យបណ្ដឹងក៏ដោយ ក៏ត្រូវអញ្ជើញមកអប់រំធ្វើកិច្ចសន្យា។ បើមានសកម្មភាពបែបនេះទៀត នឹងអនុវត្តតាមនីតិវិធី។”
ការអញ្ជើញធ្វើកិច្ចសន្យាបានធ្វើឡើងកាលពីល្ងាចថ្ងៃទី ២ មេសា ដោយលោកអនុសេនីយ៍ឯក ហ៊ុត ចំណាន នាយនគរបាលប៉ុស្តិ៍វាលវង់ បានអប់រំដល់សន្តិសុខរូបនោះឲ្យបញ្ឈប់ទង្វើបែបនេះទៀត។
អ្នកភូមិបានថតវីដេអូនេះនៅម៉ោង ៣:៣៥ រសៀល ហើយបានចែករំលែកនៅលើបណ្ដាញសង្គម ដែលធ្វើឲ្យកម្លាំងនគរបាលចាប់អារម្មណ៍ និងធ្វើការស្រាវជ្រាវភ្លាម។
