សម្តេចតេជោ ហ៊ុន សែន ទទួលសារតាំងពីឯកអគ្គរដ្ឋទូតសិង្ហបុរីថ្មី លើកកម្ពស់ទំនាក់ទំនងពាណិជ្ជកម្ម-វិនិយោគ

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានទទួលសារតាំងពីលោក ផាង ឈីវី (Pang Chee Wee) ឯកអគ្គរដ្ឋទូតថ្មីនៃសាធារណរដ្ឋសិង្ហបុរីប្រចាំនៅកម្ពុជា នៅវិមានសាមគ្គីភាពព្រឹទ្ធសភា កាលពីថ្ងៃទី២ ខែមេសា ឆ្នាំ២០២៦។

លោក ជា ធីរិទ្ធ អ្នកនាំពាក្យព្រឹទ្ធសភា បានបញ្ជាក់ថា សម្តេចតេជោបានសម្ដែងការអបអរសាទរចំពោះការតែងតាំងឯកឧត្តមជាឯកអគ្គរដ្ឋទូតសិង្ហបុរីថ្មី។ ការមកកាន់តំណែងឆាប់រហ័សនេះបង្ហាញពីការផ្ដល់តម្លៃរបស់សិង្ហបុរីចំពោះទំនាក់ទំនងជាមួយកម្ពុជា។

លោកអគ្គរដ្ឋទូតថ្មីបានសម្ដែងការអរគុណចំពោះសម្តេចតេជោ និងលើកឡើងពីទំនាក់ទំនងយូរអង្វែងរវាងប្រទេសទាំងពីរ។ ឆ្នាំ២០២៥ កន្លងទៅ ប្រទេសទាំងពីរបានប្រារព្ធគ្រប់៦០ឆ្នាំនៃទំនាក់ទំនងការទូតផ្លូវការ។

“នៅក្នុងអាណត្តិរបស់ខ្ញុំ ខ្ញុំនឹងខិតខំពង្រីកទំនាក់ទំនងរវាងកម្ពុជា និងសិង្ហបុរី ជាពិសេសក្នុងវិស័យពាណិជ្ជកម្ម សេដ្ឋកិច្ច និងការវិនិយោគ” លោកអគ្គរដ្ឋទូតបានអះអាង។

លោកបានសង្កត់ធ្ងន់ពីការខិតខំកៀងគរអ្នកវិនិយោគសិង្ហបុរីឱ្យមកវិនិយោគនៅកម្ពុជាកាន់តែច្រើន ព្រមទាំងពង្រីកទំនាក់ទំនងប្រជាជនតាមរយៈទេសចរណ៍។

សម្តេចតេជោបានសម្ដែងការពេញចិត្តចំពោះការប្ដេជ្ញាចិត្តរបស់លោកអគ្គរដ្ឋទូត និងឯកភាពថា ការទស្សនកិច្ចញឹកញាប់រវាងថ្នាក់ដឹកនាំបង្ហាញពីចំណងមិត្តភាពរឹងមាំ។

សម្តេចតេជោក៏បានលើកឡើងពីការទស្សនកិច្ចគ្នាទៅវិញទៅមករបស់នាយករដ្ឋមន្ត្រីទាំងពីរក្នុងឆ្នាំ២០២៤-២០២៥ និងអរគុណចំពោះសិង្ហបុរីក្នុងការបណ្ដុះបណ្ដាលធនធានមនុស្សនៅកម្ពុជា។

ក្នុងឱកាសនេះ សម្តេចតេជោក៏បានលើកឡើងពីបញ្ហាព្រំដែនកម្ពុជា-ថៃ និងអរគុណសិង្ហបុរីដែលបានចូលរួមអង្កេត។ សម្តេចបានបញ្ជាក់ពីជំហររក្សាបទឈប់បាញ់ និងការដោះស្រាយតាមសន្តិវិធី។

សម្តេចតេជោបានជូនពរឱ្យលោកអគ្គរដ្ឋទូតបំពេញបេសកកម្មទទួលជោគជ័យ និងពូនជ្រុំទំនាក់ទំនងរវាងប្រទេសទាំងពីរឱ្យកាន់តែរីកចម្រើន។

ជំនួបនេះបានបង្ហាញពីទំនាក់ទំនងដ៏ល្អប្រសើររវាងកម្ពុជា និងសិង្ហបុរី ដែលមានប្រវត្តិរាប់រយឆ្នាំ និងកំពុងរីកចម្រើនក្នុងគ្រប់វិស័យ។

ដោយ៖ សិលា