By យោធាអ៊ីស្រាអែលបានបញ្ជាក់ថា ប្រព័ន្ធការពារដែនអាកាសរបស់ខ្លួនកំពុងឆ្លើយតបទៅនឹងការវាយប្រហារដោយមីស៊ីលពីអ៊ីរ៉ង់ នៅថ្ងៃព្រហស្បតិ៍ ទី២ ខែមេសា ឆ្នាំ២០២៦។ ការវាយប្រហារនេះកើតឡើងត្រឹមតែមួយសន្ទុះប៉ុណ្ណោះ បន្ទាប់ពីប្រធានាធិបតីអាមេរិក លោក ដូណាល់ ត្រាំ បញ្ចប់ការថ្លែងសុន្ទរកថាទៅកាន់ប្រជាជាតិអាមេរិកអំពីស្ថានការណ៍សង្រ្គាមជាមួយអ៊ីរ៉ង់។
ក្នុងសេចក្ដីថ្លែងការណ៍មួយ យោធាអ៊ីស្រាអែលបានឱ្យដឹងថា ខ្លួនបានចាប់សញ្ញានៃការបាញ់មីស៊ីលចេញពីអ៊ីរ៉ង់ ឆ្ពោះទៅកាន់ទឹកដីអ៊ីស្រាអែលជាលើកទី៣ ក្នុងរយៈពេលត្រឹម៣ម៉ោង។ ប្រព័ន្ធការពារដែនអាកាសកំពុងធ្វើប្រតិបត្តិការស្ទាក់បំផ្លាញមីស៊ីលទាំងនោះ។
តាមយោធាអ៊ីស្រាអែល ស៊ីរ៉ែនប្រកាសអាសន្នបានបន្លឺសំឡេងឡើងនៅទូទាំងភាគខាងជើងអ៊ីស្រាអែល។ ភ្លាមៗនេះ មិនមានសេចក្ដីរាយការណ៍ពីជនរងគ្រោះ ឬការខូចខាតនៅឡើយទេ។
គួរបញ្ជាក់ថា នៅក្នុងសុន្ទរកថាទៅកាន់ប្រជាជាតិអាមេរិក លោក ដូណាល់ ត្រាំ បានអះអាងពីមហាជ័យជម្នះក្នុងសង្រ្គាមជាមួយអ៊ីរ៉ង់ និងបានអះអាងថា កងទ័ពជើងទឹក និងកងទ័ពអាកាសរបស់អ៊ីរ៉ង់ត្រូវបានបំផ្លាញ។ មេដឹកនាំរបស់អ៊ីរ៉ង់ជាច្រើននាក់ត្រូវបានសម្លាប់ ខណៈសមត្ថភាពបាញ់មីស៊ីល និងដ្រូនរបស់អ៊ីរ៉ង់ត្រូវបានកាត់បន្ថយយ៉ាងសម្បើម។
