By ខេត្តតាកែវ – កម្លាំងជំនាញមន្ទីរប្រឆាំងបទល្មើសគ្រឿងញៀន បានចុះបង្ក្រាបក្រុមជួញដូរគ្រឿងញៀនយ៉ាងធំមួយក្រុមនៅភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ នៅព្រឹកថ្ងៃទី២ ខែមេសា ឆ្នាំ២០២៦។
ការប្រតិបត្តិការនេះធ្វើឡើងក្រោមការដឹកនាំផ្ទាល់ពីឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដោយមានការសហការពីស្នងការដ្ឋានខេត្តតាកែវ និងការសម្របសម្រួលពីព្រះរាជអាជ្ញារងអមសាលាដំបូងខេត្តតាកែវ។
ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន បានបញ្ជាក់ថា៖ “ក្នុងកំឡុងប្រតិបត្តិការ ជនល្មើសបានធ្វើការតដៃជាមួយសមត្ថកិច្ច បណ្តាលឲ្យមន្ត្រីសមត្ថកិច្ច២រូបរងរបួស ហើយបច្ចុប្បន្នកំពុងត្រូវជញ្ជូនទៅមន្ទីរពេទ្យកាល់ម៉ែតសម្រាប់ការព្យាបាលបន្ទាន់។”
កម្លាំងអាជ្ញាធរបានចាប់ខ្លួនជនល្មើសសរុប៧នាក់ ក្នុងនោះមានមេក្លោងធំឈ្មោះ រាជ ដែលជាអ្នកដឹកនាំក្រុមជួញដូរគ្រឿងញៀននេះ។
វត្ថុតាងដែលឃាត់យកបានរួមមាន៖
១. គ្រឿងញៀនចំនួនច្រើន
២. កាំភ្លើងខ្លី០៣ដើម
៣. គ្រាប់កាំភ្លើងមួយចំនួន
៤. ជញ្ជីងសម្រាប់ថ្លឹងគ្រឿងញៀន២គ្រឿង
បច្ចុប្បន្ន ជនសង្ស័យទាំងអស់ និងវត្ថុតាងកំពុងត្រូវបានកម្លាំងអាជ្ញាធរកសាងសំណុំរឿងដើម្បីចាត់ការតាមនីតិវិធីច្បាប់។ ការប្រតិបត្តិការនេះបង្ហាញពីការតស៊ូមិនរួញរារបស់អាជ្ញាធរក្នុងការបង្ក្រាបបទល្មើសគ្រឿងញៀននៅតំបន់ជនបទ។
