រកឃើញក្រុមចិន១១នាក់ចាប់បង្ខាំងនារីវៀតណាម ទារប្រាក់ពីស្នាក់នៅព្រះសីហនុ

កម្លាំងនគរបាលព្រហ្មទណ្ឌ និងស្នងការដ្ឋាននគរបាលខេត្តព្រះសីហនុ បានធ្វើប្រតិបត្តិការបង្ក្រាបក្រុមចិនដែលចាប់បង្ខាំងនារីវៀតណាម និងជំរិតទារប្រាក់ ដោយឃាត់ខ្លួនជនសង្ស័យ១១នាក់ និងសង្គ្រោះជនរងគ្រោះ៣នាក់។

ប្រតិបត្តិការនេះធ្វើឡើងបន្ទាប់ពីទទួលបានពាក្យបណ្តឹងពីបុរសវៀតណាមឈ្មោះ Phan Van Tien អាយុ២៣ឆ្នាំ ដែលរាយការណ៍ថា មិត្តស្រីរបស់គាត់ឈ្មោះ Lam Thi Nheu អាយុ២១ឆ្នាំ ត្រូវបានចាប់បង្ខាំងនៅសង្កាត់វត្តភ្នំ ខណ្ឌដូនពេញ នៅថ្ងៃទី២៥ មីនា ២០២៦។

ក្រោយពីស្រាវជ្រាវយ៉ាងម៉ឺងម៉ាត់ កម្លាំងសមត្ថកិច្ចបានចូលប្រតិបត្តិការនៅថ្ងៃទី០១ មេសា នៅសង្កាត់២ ក្រុងព្រះសីហនុ ហើយឃាត់ខ្លួនជនសង្ស័យ១១នាក់ (១០ប្រុស ១ស្រី) ដែលសុទ្ធសឹងជាជនជាតិចិន។

តាមការស្រាវជ្រាវបឋម ក្រុមជនសង្ស័យបានប្រើល្បិចណាត់ជួបជាមួយនារីរងគ្រោះក្រោមរូបភាពបម្រើសេវាផ្លូវភេទ បន្ទាប់មកចាប់បង្ខាំង និងជំរិតទារប្រាក់។ ក្រុមនេះធ្លាប់បានប្រព្រឹត្តអំពើដូចគ្នាជាច្រើនលើកមកហើយ។

បច្ចុប្បន្ន ជនសង្ស័យទាំងអស់កំពុងត្រូវបានសាកសួរ និងរៀបចំនីតិវិធីបន្តនៅនាយកដ្ឋាននគរបាលព្រហ្មទណ្ឌ ខណៈជនរងគ្រោះត្រូវបានសង្គ្រោះ និងផ្តល់ការថែទាំសុវត្ថិភាពតាមនីតិវិធី។