តម្លៃប្រេងហក់ខ្ពស់ឡើងវិញ ក្រោយត្រាំគំរាមវាយប្រហារអ៊ីរ៉ង់

តម្លៃប្រេងអន្តរជាតិបានហក់ឡើងខ្ពស់ជាថ្មីក្រោយពីលោកប្រធានាធិបតីដូណាល់ ត្រាំ ប្ដេជ្ញានឹងបន្តការវាយប្រហារអ៊ីរ៉ង់។ ការកើនឡើងនេះបានធ្វើឱ្យវិនិយោគិនព្រួយបារម្ភពីការរំខានផ្នែកផ្គត់ផ្គង់ប្រេងពីមជ្ឈិមបូព៌ា។

តម្លៃប្រេងម៉ាក Brent បានកើនឡើង ៧,៨៧ ដុល្លារ ឬ ៧,៧៨% ដល់ ១០៩,០៣ ដុល្លារ/បារ៉ែល ខណៈប្រេងអាមេរិកម៉ាក WTI កើន ១១,៤២ ដុល្លារ ឬ ១១,៤១% ដល់ ១១១,៥៤ ដុល្លារ/បារ៉ែល។

លោកត្រាំបានប្រកាសថា៖ «យើងនឹងវាយប្រហារពួកគេឱ្យខ្លាំងក្នុងរយៈពេល ២-៣ សប្តាហ៍ខាងមុខ។ យើងនឹងនាំពួកគេត្រឡប់ទៅយុគសម័យថ្មវិញ»។ ទោះជាយ៉ាងណា លោកមិនបានផ្តល់ព័ត៌មានលម្អិតអំពីការបើកច្រកសមុទ្រហ័រមូហ្សឡើងវិញនោះទេ។

អ៊ីរ៉ង់បានបិទច្រកហ័រមូហ្ស ដែលជាផ្លូវទឹកសំខាន់សម្រាប់ដឹកជញ្ជូនប្រេង ២០% នៃតម្រូវការសកល ដើម្បីសងសឹកទៅនឹងការវាយប្រហាររបស់អាមេរិកនិងអ៊ីស្រាអែល។

បច្ចុប្បន្ន អ៊ីរ៉ង់កំពុងរៀបចំពិធីសារជាមួយអូម៉ង់ ដើម្បីត្រួតពិនិត្យចរាចរណ៍នៅក្នុងច្រកសមុទ្រហ័រមូហ្ស ខណៈដែលការបើកច្រកសមុទ្រឡើងវិញបានក្លាយជាអាទិភាពសម្រាប់រដ្ឋាភិបាលជុំវិញពិភពលោក។