ជាងមួយរយជនបរទេសជាប់ឃុំក្នុងប្រតិបត្តិការបង្ក្រាបការប្រព្រឹត្តបទល្មើសអនឡាញនៅកាស៊ីណូស្វាយរៀង

ខេត្តស្វាយរៀង៖ កម្លាំងនគរបាលជាតិបានធ្វើប្រតិបត្តិការបង្ក្រាបទីតាំងប្រព្រឹត្តបទល្មើសអនឡាញនៅកាស៊ីណូមួយក្នុងស្រុកចន្ទ្រា ដោយឃាត់ខ្លួនជនពាក់ព័ន្ធសរុប ១០៧នាក់។

ប្រតិបត្តិការនេះដឹកនាំដោយឧត្តមសេនីយ៍ឯក ហែម សុវត្ថិ អគ្គស្នងការរងនគរបាលជាតិ ដោយមានការសម្របសម្រួលពីព្រះរាជអាជ្ញារង ដូរ៉ា អង្គប្រទាន។ ការចុះត្រួតពិនិត្យធ្វើឡើងនៅក្រុមហ៊ុនកាស៊ីណូ សៀងហៃ រីហ្សត ក្នុងភូមិចេក ឃុំសំរោង បន្ទាប់ពីរកឃើញសកម្មភាពសង្ស័យ។

ក្នុងចំណោមជនពាក់ព័ន្ធ ១០៧នាក់ មានជនបរទេសពី៤សញ្ជាតិ៖ ចិន៦៧នាក់ ឥណ្ឌូនេស៊ី២១នាក់ វៀតណាម១៧នាក់ និងមីយ៉ាន់ម៉ា២នាក់។ សមត្ថកិច្ចបានរកឃើញសម្ភារៈបច្ចេកវិទ្យាច្រើន រួមមាន កំព្យូទ័រលើតុ ៨៩គ្រឿង កំព្យូទ័រយួរដៃ ៥៧គ្រឿង iPad ៧៣គ្រឿង និងទូរស័ព្ទដៃ ១,៤២១គ្រឿង។

សមត្ថកិច្ចបានកំណត់ថា ក្នុងចំណោមជនពាក់ព័ន្ធទាំងអស់ មាន៤នាក់បានប្រព្រឹត្តសកម្មភាពល្បែងស៊ីសងតាមអនឡាញខុសច្បាប់តាមរយៈវេបសាយ BABY SLOT និង២នាក់ទៀតពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា (ONLINE SCAM)។

ជនសង្ស័យ៤នាក់ត្រូវបានបញ្ជូនទៅអយ្យការ ខណៈជនបរទេសផ្សេងទៀត ១០១នាក់ត្រូវបានបញ្ជូនទៅអគ្គនាយកដ្ឋានអន្តោប្រវេសន៍ដើម្បីបន្តនីតិវិធី។

ប្រតិបត្តិការនេះធ្វើឡើងស្របតាមច្បាប់ និងការដឹកនាំពីសម្ដេចនាយករដ្ឋមន្រ្តី ហ៊ុន ម៉ាណែត និងអភិសន្តិបណ្ឌិត ស សុខា រដ្ឋមន្រ្តីក្រសួងមហាផ្ទៃ។