By កម្លាំងនគរបាលខេត្តស្វាយរៀងបានធ្វើប្រតិបត្តិការបង្ក្រាបយ៉ាងធំមួយ ដោយឃាត់ខ្លួនមេខ្លោងចែកចាយគ្រឿងញៀនជនជាតិវៀតណាមចំនួន៣នាក់ និងរឹបអូសគ្រឿងញៀនសរុបទម្ងន់ជាង១០គីឡូក្រាមនៅក្រុងបាវិត។
ប្រតិបត្តិការនេះធ្វើឡើងតាមបទបញ្ជារបស់អគ្គស្នងការនគរបាលជាតិ នាយឧត្តមសេនីយ៍ ស ថេត ដោយមានការដឹកនាំផ្ទាល់ពីលោកឧត្ដមសេនីយ៍ទោ ពេជ្រ វីរៈ ស្នងការនគរបាលខេត្ត និងលោកឧត្ដមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន។
ការបង្ក្រាបកើតឡើងនៅថ្ងៃទី៣០ ខែមីនា ឆ្នាំ២០២៦ នៅចំណុចបន្ទប់ជួលក្នុងភូមិបាវិតលើ សង្កាត់បាវិត ក្រុងបាវិត។ កម្លាំងការិយាល័យប្រឆាំងគ្រឿងញៀនខេត្ត និងអធិការដ្ឋាននគរបាលក្រុងបាវិតបានរួមគ្នាបើកប្រតិបត្តិការយ៉ាងសម្ងាត់។
ជនសង្ស័យទាំង៣នាក់ដែលត្រូវបានឃាត់ខ្លួនមាន៖
- ឈ្មោះ ង្វៀង ហ្វឹកហ្វី អាយុ៣០ឆ្នាំ
- ឈ្មោះ ង្វៀង ថេយី អាយុ៣១ឆ្នាំ
- ឈ្មោះ ប៊ួយ មិញធួ (ស្រី) អាយុ២៩ឆ្នាំ
គ្រឿងញៀនដែលរឹបអូសបានមានទម្ងន់សរុប១០គីឡូក្រាម៣២៨.៧៩ក្រាម រួមមាន៖
- កេតាមីន៖ ៧គីឡូ៧៣៤.៨៥ក្រាម
- MDMA៖ ២គីឡូ៥៩៣.៥៥ក្រាម
- មេតំហ្វេតាមីន៖ ០.៣៩ក្រាម
ក្រៅពីគ្រឿងញៀន កម្លាំងនគរបាលក៏បានរឹបអូសជញ្ជីងថ្លឹងថ្នាំញៀន១គ្រឿង ទូរស័ព្ទដៃ៨គ្រឿង រថយន្ត១គ្រឿង លិខិតឆ្លងដែន២ក្បាល អត្តសញ្ញាណប័ណ្ណវៀតណាម១សន្លឹក ព្រមទាំងម៉ាសុីនសម្ភារឧបករណ៍កែច្នៃគ្រឿងញៀនមួយចំនួនទៀត។
បច្ចុប្បន្ន ជនសង្ស័យទាំង៣នាក់ រួមទាំងវត្ថុតាងទាំងអស់ត្រូវបានកសាងសំណុំរឿងដើម្បីបញ្ជូនទៅសាលាដំបូងខេត្តស្វាយរៀង ដើម្បីចាត់ការតាមច្បាប់។
លោកឧត្តមសេនីយ៍ត្រី កែវ សុថា បានបញ្ជាក់ថា ប្រតិបត្តិការនេះបង្ហាញពីការតស៊ូរបស់អាជ្ញាធរក្នុងការប្រឆាំងនឹងគ្រឿងញៀន និងការពារសន្តិសុខសង្គម។
