តុលាការឃុំខ្លួនបុរសភេទទី៣ ដែលបង្ហោះសាររិះគន់នគរបាលក្រោយត្រួតពិនិត្យជាតិស្រវឹង

ភ្នំពេញ៖ ចៅក្រមស៉ើបសួរសាលាដំបូងរាជធានីភ្នំពេញ លោក លឹម សុគន្ធារ៉ា បានសម្រេចឃុំខ្លួនបុរសភេទទី៣ ដែលបង្ហោះសាររិះគន់លើនគរបាលក្រោយត្រួតពិនិត្យជាតិស្រវឹង។ ជនសង្ស័យឈ្មោះ ប៉ែនភ័ក្រ សុរីធន់ ហៅ គីម យ៉ាអែម ត្រូវចោទប្រកាន់៣បទល្មើស រួមមាន ញុះញង់បង្កភាពវឹកវរ ប្រមាថអ្នករាជការ និងប្រើប្រាស់ឯកសារក្លែង។

ព្រឹត្តិការណ៍នេះកើតឡើងក្រោយពីថ្ងៃទី៣១ មីនា ឆ្នាំ២០២៦ នៅវេលាម៉ោង១៤:៣០នាទី កម្លាំងនគរបាលការិយាល័យព្រហ្មទណ្ឌកម្រិតស្រាល បានឃាត់ខ្លួនជនសង្ស័យដែលជាម្ចាស់គណនីហ្វេសប៊ុកឈ្មោះ «Kim Ya An»។ ជនសង្ស័យបានបង្ហោះសាររិះគន់ក្រោយត្រួតពិនិត្យជាតិស្រវឹងដែលបានធ្វើឡើងនៅយប់ថ្ងៃទី៣០ មីនា។

ក្នុងព្រឹត្តិការណ៍ត្រួតពិនិត្យជាតិស្រវឹងនៅយប់ថ្ងៃទី៣០ មីនា សមត្ថកិច្ចបានឃាត់រថយន្ត NISSAN ពណ៌ស ផ្លាកលេខ 2BV-5087 ដើម្បីត្រួតពិនិត្យជាតិអាល់កុល។ អ្នកបើកបរបានផ្លុំឧបករណ៍វាស់ជាតិអាល់កុល ដោយលើកទី១និងទី២ផ្លុំមិនត្រឹមត្រូវ ហើយលើកទី៣បានលទ្ធផល 0,55 Mg/l។

សមត្ថកិច្ចបានបំពេញឯកសារផាកពិន័យ ហើយអ្នកបើកបរបានយល់ព្រមផ្តិតមេដៃទទួលការផាកពិន័យ។ ក្រោយពេលពិន័យរួច សមត្ថកិច្ចបានអនុញ្ញាតឲ្យគាត់បើករថយន្តបន្តដំណើរ។

ទោះជាយ៉ាងណា នៅព្រឹកថ្ងៃបន្ទាប់ អ្នកបើកបរបានបង្ហោះព័ត៌មានមិនពិតលើហ្វេសប៊ុក ដោយអះអាងថាសមត្ថកិច្ចបានបង្ខំឲ្យផ្លុំច្រើនដង និងទារប្រាក់៥០០ដុល្លារ។ សារនេះមានលក្ខណៈញុះញង់ និងប៉ះពាល់កិត្តិយសសមត្ថកិច្ច។

សមត្ថកិច្ចបានចាត់ទុកថា ការត្រួតពិនិត្យជាតិស្រវឹងគឺជាផ្នែកនៃការកាត់បន្ថយគ្រោះថ្នាក់ចរាចរណ៍ ដែលភាគច្រើនកើតឡើងដោយសារគ្រឿងស្រវឹង។ ជនសង្ស័យបានសារភាពថា ខ្លួនពិតជាស្រវឹង និងបានផឹកស្រាបៀរជាមួយមិត្តភក្តិ៣នាក់មុនពេលបើករថយន្ត។