By 
ភ្នំពេញ៖ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា ធនធានមនុស្ស និងទំនាក់ទំនងវិជ្ជាជីវៈ គឺជាកត្តាស្នូលនៃភាពជោគជ័យរបស់សហគ្រាស ក្រុមហ៊ុន និងរោងចក្រ ក្នុងសម័យដែល AI កំពុងបំប្លែងទីផ្សារកម្លាំងការងារយ៉ាងឆាប់រហ័ស។
ក្នុងវេទិកាធនធានមនុស្សឆ្នាំ២០២៦ របស់សភាពាណិជ្ជកម្មអឺរ៉ុបប្រចាំកម្ពុជា (EuroCham) នាថ្ងៃទី៣ មេសា ឆ្នាំ២០២៦ នៅសណ្ឋាគារ Novotel លោករដ្ឋមន្ត្រីបានលើកឡើងថា ការអភិវឌ្ឍធនធានមនុស្សបានក្លាយជាកត្តាយុទ្ធសាស្ត្រស្នូលសម្រាប់ការប្រកួតប្រជែង និងការរីកចម្រើននាពេលអនាគត។
សម្រាប់កម្ពុជា រាជរដ្ឋាភិបាលបានវិនិយោគ ១០០លានដុល្លារក្នុងមួយឆ្នាំ ដល់មូលនិធិបណ្តុះបណ្តាលជំនាញ (SDF) សម្រាប់ផ្តល់ហិរញ្ញប្បទានដល់សហគ្រាស ក្រុមហ៊ុន និងរោងចក្រ ដោយផ្ទាល់សម្រាប់ចូលរួមបណ្តុះបណ្តាលធនធានមនុស្ស។
ទន្ទឹមនឹងនេះ ក្រសួងកំពុងធ្វើទំនើបកម្មប្រព័ន្ធ TVET ដើម្បីផ្គត់ផ្គង់ដល់វិនិយោគិននូវកម្លាំងពលកម្មវ័យក្មេងដែលមានថាមពល និងសក្ដានុពល ស្របតាមចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។
លោករដ្ឋមន្ត្រីបានសង្កត់ធ្ងន់ពីការប្តេជ្ញាចិត្តក្នុងការកសាងភាពជាដៃគូយុទ្ធសាស្ត្ររវាងគ្រឹះស្ថានបណ្តុះបណ្តាលបច្ចេកទេស និងវិស័យឧស្សាហកម្ម ដើម្បីរួមគ្នាបង្កើតកម្មវិធីសិក្សាផ្អែកលើការអនុវត្តការងារជាក់ស្តែង កម្មវិធីហ្វឹកហ្វឺនកូនជាង និងការបណ្តុះបណ្តាលនៅកន្លែងធ្វើការ។
លោករដ្ឋមន្ត្រីសង្ឃឹមថា តាមរយៈវេទិកាថ្ងៃនេះ នឹងទទួលបានធាតុចូលល្អៗសម្រាប់ជួយពង្រឹងការអភិវឌ្ឍធនធានមនុស្សនៅកម្ពុជា ហើយជំរុញឱ្យមានការវិនិយោគបន្ថែមលើធនធានមនុស្ស ដែលមិនត្រូវគិតថាជាការចំណាយ តែជាការវិនិយោគយុទ្ធសាស្ត្រនៅក្នុងសមត្ថភាពប្រកួតប្រជែង។
ក្នុងវេទិកានេះដែរ លោក Tassilo Brinzer ប្រធានសភាពាណិជ្ជកម្មអឺរ៉ុបប្រចាំកម្ពុជា (EuroCham) បានលើកឡើងថា កម្លាំងការងារនៅតែជាឆ្អឹងខ្នងដ៏សំខាន់នៃការអភិវឌ្ឍសេដ្ឋកិច្ចកម្ពុជា។
លោកបានបញ្ជាក់ថា EuroCham នឹងបន្តការគាំទ្រដល់រាជរដ្ឋាភិបាល ជាពិសេសភាពជាដៃគូជាមួយក្រសួងការងារ ដើម្បីអភិវឌ្ឍវិស័យនេះសម្រាប់ជាអត្ថប្រយោជន៍រួមទាំងវិស័យនេះ និងសមាជិកទាំងអស់នៅកម្ពុជា។
ការទទួលយកឧបករណ៍ឌីជីថលក្នុងការជ្រើសរើស បណ្តុះបណ្តាល ការគ្រប់គ្រងទីផ្សារ និងប្រតិបត្តិការអាជីវកម្ម នឹងជួយលើកកម្ពស់ផលិតភាព និងបន្ថយសម្ពាធលើប្រាក់ឈ្នួល។
ដោយ៖ តារា
