នាយករដ្ឋមន្ត្រីហុងគ្រី ទាមទារឲ្យ EU លុបទណ្ឌកម្មថាមពលរុស្ស៊ី ដើម្បីជៀសវាងវិបត្តិសេដ្ឋកិច្ចធ្ងន់ធ្ងរ

ភ្នំពេញ – នាយករដ្ឋមន្ត្រីហុងគ្រី លោក Viktor Orbán បានធ្វើការអំពាវនាវយ៉ាងខ្លាំងក្លាទៅកាន់សហភាពអឺរ៉ុប (EU) ដើម្បីលុបចោលទណ្ឌកម្មទាំងឡាយដែលដាក់លើវិស័យថាមពលរបស់រុស្ស៊ី ដោយដាស់តឿនពីគ្រោះថ្នាក់នៃវិបត្តិសេដ្ឋកិច្ចដ៏ធ្ងន់ធ្ងរបំផុតមួយក្នុងប្រវត្តិសាស្ត្រ។

លោក Orbán បានបង្ហាញជំហររបស់ខ្លួនតាមរយៈបណ្តាញសង្គម X នៅថ្ងៃព្រហស្បតិ៍ទី២ ខែមេសា ដោយអះអាងថា៖ “អឺរ៉ុបកំពុងប្រឈមមុខនឹងវិបត្តិសេដ្ឋកិច្ចដ៏ធ្ងន់ធ្ងរបំផុតមួយក្នុងប្រវត្តិសាស្ត្រ។ មធ្យោបាយតែមួយគត់ដើម្បីគេចផុតពីវិបត្តិនេះ គឺត្រូវដកទណ្ឌកម្មលើថាមពលរុស្ស៊ីជាបន្ទាន់។”

ការអំពាវនាវនេះបានមកក្រោយពីការជជែកដេញដោលរវាងលោក Orbán និងនាយករដ្ឋមន្ត្រីប៉ូឡូញ លោក Donald Tusk ដែលបានរិះគន់សកម្មភាពថ្មីៗរបស់ហុងគ្រី។ លោក Tusk បានដាស់តឿនពី “វិបត្តិថាមពលដ៏ធំនៅអឺរ៉ុប” និងការគំរាមកំហែងនៃការដកខ្លួនចេញពីណាតូ។

ក្នុងការឆ្លើយតប លោក Orbán បានសរសេរទៅកាន់លោក Tusk ថា៖ “ជំនួសឲ្យការបង្កសង្គ្រាម ចូរស្រឡាញ់ និងជួយសង្គ្រោះប្រទេសរបស់អ្នក លោក Donald។ សូមព្រួយបារម្ភអំពីប្រទេស និងប្រជាជនរបស់អ្នក ជាជាងលោកពូទីន។”

ទំនាក់ទំនងរវាងអ្នកដឹកនាំទាំងពីរ ដែលធ្លាប់ជាសម្ព័ន្ធមិត្តនយោបាយជិតស្និទ្ធ បានកាន់តែតានតឹងក្នុងរយៈពេលប៉ុន្មានខែថ្មីៗនេះ។ ការប៉ុនប៉ងរបស់លោក Orbán ក្នុងការរារាំងទណ្ឌកម្មបន្ថែមទៀតលើរុស្ស៊ី និងការកាត់បន្ថយជំនួយដល់អ៊ុយក្រែន បានធ្វើឲ្យមានការប៉ះទង្គិចគ្នាជាច្រើនលើក។

របាយការណ៍ផ្សព្វផ្សាយថ្មីៗបានបង្ហាញពីទំនាក់ទំនងជិតស្និទ្ធរវាងរដ្ឋាភិបាលហុងគ្រី និងទីក្រុងមូស្គូ ដែលធ្វើឲ្យមានការសួរសំណួរអំពីភាពស្មោះត្រង់របស់ប្រទេសនេះក្នុងជំហររួមរបស់ EU។

អត្ថបទ៖ សាង ស្រីល័ក្ខ