By ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចេញបទបញ្ជាតឹងរឹងចំពោះករណីលួចនាំប្រេងខុសច្បាប់ពីប្រទេសថៃចូលមកលក់នៅកម្ពុជា ដោយបញ្ជាឲ្យដកអាជ្ញាប័ណ្ណក្រុមហ៊ុន និងបណ្ដេញចេញពីក្របខណ្ឌចំពោះមន្ត្រីរាជការ ឬកម្លាំងប្រដាប់អាវុធដែលពាក់ព័ន្ធ។
បទបញ្ជានេះត្រូវបានបង្ហោះលើផេកផ្លូវការនាថ្ងៃទី៣ ខែមេសា ឆ្នាំ២០២៦ បន្ទាប់ពីសម្តេចបានឃើញការចុះផ្សាយព័ត៌មានពីបណ្ដាញសារព័ត៌មានថៃ អំពីបណ្ដាញលួចនាំប្រេងខុសច្បាប់ចូលកម្ពុជា។
សម្តេចបានបញ្ជាឲ្យអ្នកដឹកនាំជាន់ខ្ពស់ចំនួនបីរូប រួមមាន ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល ឯកឧត្តម ស ថេត អគ្គស្នងការនគរបាលជាតិ និងឯកឧត្តម គុណ ញឹម អគ្គនាយកអគ្គនាយកដ្ឋានគយ និងរដ្ឋាករកម្ពុជា ស្រាវជ្រាវករណីនេះឲ្យបានច្បាស់លាស់។
“ប្រសិនជាមានករណីនេះពិតប្រាកដមែន ត្រូវស្រាវជ្រាវឲ្យឃើញមុខសញ្ញាពាក់ព័ន្ធទាំងអស់ ហើយត្រូវចាត់វិធានការច្បាប់ឲ្យបានតឹងរឹងបំផុត” ជាការបញ្ជាក់ពីសម្តេចធិបតី។
សម្តេចបានបញ្ជាក់បន្ថែមថា កម្ពុជាបានផ្អាកការទិញប្រេងឥន្ធនៈ និងឧស្ម័នឥន្ធនៈគ្រប់ប្រភេទពីប្រទេសថៃចាប់តាំងពីខែមិថុនាឆ្នាំ២០២៥ ហើយកម្ពុជាមានប្រភពប្រេងពីប្រទេសផ្សេងៗគ្រប់គ្រាន់រួចហើយ។
ការចេញបទបញ្ជាតឹងរឹងនេះបង្ហាញពីភាពអាណិតស្រឡាញ់របស់រដ្ឋាភិបាលចំពោះសុខុមាលភាពប្រជាពលរដ្ឋ និងការការពារប្រជាជនកម្ពុជាពីការលក់ប្រេងគ្មានសុវត្ថិភាព។
ដោយ៖ សិលា
