អតីតសង្ឃអាយុ ២៨ឆ្នាំ ត្រូវចាប់ខ្លួនពីបទលួចមានទំនាក់ទំនងស្នេហាជាមួយស្ត្រីក្មេងៗ រហូតមានកូន

ភ្នំពេញ៖ សមត្ថកិច្ចនគរបាលរាជធានីភ្នំពេញ និងខេត្តបាត់ដំបង បានចាប់ខ្លួនអតីតព្រះសង្ឃម្នាក់ ដែលត្រូវបានចោទថាបានលួចមានទំនាក់ទំនងស្នេហាជាមួយស្ត្រីក្មេងៗជាច្រើន រហូតមានកូនផង។

ជនត្រូវចោទ ឈ្មោះ ជា វុទ្ធី អាយុ ២៨ឆ្នាំ ត្រូវបានចាប់ខ្លួននៅវត្តពោធិ៍វាល ក្រុងបាត់ដំបង កាលពីថ្ងៃទី១ ខែមេសា ឆ្នាំ២០២៦។ ការចាប់ខ្លួននេះត្រូវបានធ្វើឡើងតាមដីកាបង្គាប់ឱ្យនាំខ្លួនពីចៅក្រមស៊ើបសួរ ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។

តាមការបញ្ជាក់ពីស្នងការដ្ឋាននគរបាលរាជធានីភ្នំពេញ ជនត្រូវចោទបានប្រព្រឹត្តខុសវិន័យសង្ឃយ៉ាងធ្ងន់ធ្ងរ (បារាជិក) ដោយលួចលាក់មានទំនាក់ទំនងស្នេហាជាមួយស្ត្រីក្មេងៗជាច្រើន ហើយពេលខ្លះបានលួចដោះស្បង់ជីវរណាត់ជួបស្រីស្នេហ៍ រហូតមានកូនថែមទៀត។

សមត្ថកិច្ចបានបញ្ជាក់ថា ការចាប់ខ្លួននេះត្រូវបានអនុវត្តតាមនីតិវិធីច្បាស់លាស់ ដោយមានភស្តុតាងគ្រប់គ្រាន់ ហើយមិនមានជាប់ពាក់ព័ន្ធនឹងកិច្ចការនយោបាយឡើយ។ សមត្ថកិច្ចក៏បានបដិសេធនឹងការចោទប្រកាន់ពីក្រុមមួយចំនួនតូចដែលអះអាងថាការចាប់ខ្លួននេះរំលោភសិទ្ធិសេរីភាព។

បច្ចុប្បន្ន ជនត្រូវចោទត្រូវបានឃុំខ្លួនជាបណ្តោះអាសន្ននៅពន្ធនាគាររាជធានីភ្នំពេញ រង់ចាំការស៊ើបអង្កេតបន្ថែម។