ត្រាំអះអាងថា អាមេរិកអាចបើកច្រកហរមូសវិញ យកប្រេងរកប្រាក់ចំណេញ

ប្រធានាធិបតីអាមេរិក លោក ដូណាល់ ត្រាំ បានប្រកាសថា អាមេរិកអាចបើកច្រកហរមូសឡើងវិញបានយ៉ាងងាយស្រួល ដើម្បីយកប្រេង និងរកប្រាក់ចំណេញ នៅពេលដែលសង្គ្រាមរវាងអាមេរិក-អ៊ីស្រាអែល និងអ៊ីរ៉ង់ កំពុងធ្វើឲ្យតម្លៃប្រេងហក់ឡើងខ្ពស់។

លោកត្រាំបានសរសេរនៅលើ Truth Social កាលពីថ្ងៃសុក្រទី៣មេសា ថា៖ «នៅសល់ពេលវេលាបន្តិចទៀត យើងអាចបើកច្រកសមុទ្រ Hormuz បានយ៉ាងងាយស្រួល យកប្រេង និងរកប្រាក់ចំណេញ។ វានឹងក្លាយជាការហៀរហូរសម្រាប់ពិភពលោក»។

យោងតាម Reuters ការវាយប្រហារសងសឹករបស់អ៊ីរ៉ង់បានរំខានដល់ការដឹកជញ្ជូនតាមច្រកសមុទ្រហរមូស ដែលជាផ្លូវដឹកជញ្ជូនថាមពលសំខាន់ និងទទួលខុសត្រូវចំពោះការផ្គត់ផ្គង់ប្រេងប្រហែលមួយភាគប្រាំរបស់ពិភពលោក។

សង្គ្រាមនេះបានចាប់ផ្តើមជាមួយនឹងការវាយប្រហារតាមអាកាសរួមគ្នារវាងអាមេរិក និងអ៊ីស្រាអែល នៅចុងខែកុម្ភៈ ហើយបច្ចុប្បន្នកំពុងរីករាលដាលភាពវឹកវរនៅទូទាំងតំបន់។ អ៊ីរ៉ង់បានបិទច្រកសមុទ្រហរមូស ដើម្បីសងសឹកចំពោះការវាយប្រហារទាំងនេះ។

ការបិទច្រកសមុទ្រនេះបានធ្វើឲ្យតម្លៃថាមពលកើនឡើងខ្ពស់ និងធ្វើឲ្យទីផ្សារហិរញ្ញវត្ថុរង្គោះរង្គើ ដែលបង្កើនសម្ពាធលើលោកត្រាំឲ្យស្វែងរកដំណោះស្រាយរហ័សចំពោះជម្លោះ។ លោកបានគំរាមកំហែងប្រឆាំងនឹងរោងចក្រថាមពលស៊ីវិលរបស់អ៊ីរ៉ង់ ប៉ុន្តែមិនបានផ្តល់ពេលវេលាច្បាស់លាស់សម្រាប់ការបញ្ចប់អរិភាពនេះទេ។

អត្ថបទ៖ សាង ស្រីល័ក្ខ