By 
ភ្នំពេញ៖ ដើម្បីធានាបាននូវសណ្តាប់ធ្នាប់ និងរបៀបរៀបរយក្នុងការគ្រប់គ្រងចំណតរថយន្ត អាជ្ញាធរមូលដ្ឋានសង្កាត់ច្បារអំពៅទី២ បានចូលរួមជាមួយកម្មករបេនឡានផ្សារច្បារអំពៅ ក្នុងការរៀបចំគូសគំនូសសម្គាល់ចំណតសម្រាប់រថយន្តភ្ញៀវ។
លោក ឡោ សុផល អ្នកប្រចាំការនៅចំណតរថយន្តច្បារអំពៅ បានឲ្យដឹងថា៖ “ការគូសគំនូសនេះធ្វើឡើងតាមការណែនាំរបស់អាជ្ញាធរមូលដ្ឋាន ដើម្បីចូលរួមរៀបចំសណ្តាប់ធ្នាប់តាមដងផ្លូវ៣៦៩។ យើងធ្វើការជារៀងរាល់ថ្ងៃជាមួយកម្លាំងសន្តិសុខ ដើម្បីការពារកុំឲ្យមានការកកស្ទះចរាចរណ៍។”
លោក យុិន វុធ ចៅសង្កាត់ច្បារអំពៅទី២ បានបញ្ជាក់ថា៖ “កម្លាំងគណៈបញ្ជាការឯកភាពសង្កាត់របស់យើង តែងរៀបចំសណ្តាប់ធ្នាប់លើផ្លូវ៣៦៩ជារៀងរាល់ព្រឹក ទោះបីជាថ្ងៃសម្រាកឬថ្ងៃបុណ្យក៏ដោយ។ យើងសូមអំពាវនាវដល់ប្រជាពលរដ្ឋសូមចូលរួមរក្សាសណ្តាប់ធ្នាប់ ជាពិសេសកុំយកទំនិញមកដាក់លក់លើចិញ្ចើមផ្លូវ។”
ការសហការនេះបង្ហាញពីការខិតខំប្រឹងប្រែងរបស់អាជ្ញាធរមូលដ្ឋាន និងសហគមន៍ក្នុងការបង្កើនសណ្តាប់ធ្នាប់ចរាចរណ៍ និងការគ្រប់គ្រងចំណតរថយន្តឲ្យកាន់តែមានប្រសិទ្ធភាពនៅក្នុងតំបន់។
