អ៊ីរ៉ង់ចាត់ថ្នាក់ប្រទេស ៣ ក្រុម គ្រប់គ្រងការឆ្លងកាត់ច្រកសមុទ្រហ័រមូស

អន្តរជាតិ៖ អ៊ីរ៉ង់បានចាត់ថ្នាក់ប្រទេសជុំវិញពិភពលោកជា ៣ ក្រុមធំៗ ដើម្បីគ្រប់គ្រងការឆ្លងកាត់ច្រកសមុទ្រហ័រមូស ដែលជាច្រកសមុទ្រសំខាន់សម្រាប់ការដឹកជញ្ជូនប្រេងកាតពិភពលោក។

សារព័ត៌មាន Al Jazeera បានរាយការណ៍ថា មន្ត្រីអ៊ីរ៉ង់បានបង្កើតប្រព័ន្ធថ្មីមួយដើម្បីគ្រប់គ្រងសកម្មភាពសមុទ្រនៅក្នុងច្រកសមុទ្រហ័រមូស។ ប្រព័ន្ធនេះចាត់ថ្នាក់ប្រទេសទាំងអស់ជា ៣ ក្រុមគឺ៖ «អរិភាព» «អព្យាក្រឹត» និង «មិត្តភាព»។

ប្រទេសនៅក្នុងក្រុម «អរិភាព» នឹងត្រូវបានហាមឃាត់មិនឱ្យប្រើប្រាស់ច្រកសមុទ្រហ័រមូសទាំងស្រុង។ ចំណែកកប៉ាល់មកពីប្រទេសអព្យាក្រឹតនឹងត្រូវបង់ថ្លៃខ្ពស់សម្រាប់ការឆ្លងកាត់។ រីឯកប៉ាល់មកពីប្រទេសមិត្តវិញ នឹងត្រូវបានអនុញ្ញាតឱ្យឆ្លងកាត់ដោយមិនគិតថ្លៃ។

ទីក្រុងតេអេរ៉ង់មិនទាន់បានចេញផ្សាយបញ្ជីពេញលេញនៃក្រុមទាំងបីនេះនៅឡើយទេ។ ទោះជាយ៉ាងណាក៏ដោយ យោងតាម Al Jazeera ប្រទេសអារ៉ាប់ស្ទើរតែទាំងអស់នៅក្នុងឈូងសមុទ្រពែរ្សត្រូវបានចាត់ថ្នាក់ថាអព្យាក្រឹត ឬអរិភាព។

អ៊ីរ៉ង់បានបិទច្រកសមុទ្រហ័រមូសស្ទើរតែទាំងស្រុងកាលពីមុន ដែលជាច្រកឆ្លងកាត់ប្រេងមួយភាគប្រាំរបស់ពិភពលោក។ សកម្មភាពនេះធ្វើឡើងដើម្បីសងសឹកចំពោះការវាយប្រហារដោយសហរដ្ឋអាមេរិក និងអ៊ីស្រាអែល។

ការបើកច្រកសមុទ្រឡើងវិញបានក្លាយជាអាទិភាពចម្បងសម្រាប់រដ្ឋាភិបាលជាច្រើននៅជុំវិញពិភពលោក ខណៈដែលតម្លៃថាមពលកើនឡើងខ្ពស់។ ព័ត៌មាននេះក៏ត្រូវបានដកស្រង់ដោយទីភ្នាក់ងារសារព័ត៌មានរុស្ស៊ី Tass នៅថ្ងៃទី ៤ ខែមេសាផងដែរ។