By ខេត្តស្ទឹងត្រែង៖ នារសៀលថ្ងៃទី០៤ មេសា ២០២៦ លោក ទូច គង្គា អភិបាលរងខេត្តស្ទឹងត្រែង និងជាអនុប្រធានក្រុមការងារចុះជួយមូលដ្ឋានស្រុកបុរីអូរស្វាយសែនជ័យ ព្រមទាំងលោកស្រីជាភរិយា បានអញ្ជើញជាអធិបតីក្នុងពិធីបើក«សង្ក្រាន្តបុរីអូរស្វាយសែនជ័យ» ដើម្បីអបអរសាទរពិធីចូលឆ្នាំប្រពៃណីជាតិខ្មែរ។
ក្នុងពិធីនេះ ក៏មានការអញ្ជើញចូលរួមជាគណៈអធិបតីដោយ លោកស្រី ឡុង ភិរម្យ រដ្ឋលេខាធិការនៃក្រសួងទេសចរណ៍ និងលោក ផាន់ យុត អភិបាលស្រុកនិងភរិយា។ ព្រឹត្តិការណ៍នេះក៏មានការចូលរួមពីថ្នាក់ដឹកនាំមន្ទីរអង្គភាពជុំវិញខេត្ត កងកម្លាំង មន្រ្តីរាជការ លោកគ្រូអ្នកគ្រូ និងប្រជាពលរដ្ឋជាច្រើននាក់។
ការរៀបចំព្រឹត្តិការណ៍«សង្ក្រាន្តបុរីអូរស្វាយសែនជ័យ»មានគោលបំណងថែរក្សាប្រពៃណីទំនៀមទម្លាប់ដ៏ល្អរបស់ខ្មែរ និងស្វាគមន៍ទេវតាឆ្នាំថ្មីក្នុងឱកាសបុណ្យចូលឆ្នាំខ្មែរ ឆ្នាំមមី អដ្ឋស័ក ព.ស.២៥៧០។
លោកអភិបាលរងខេត្តបានអំពាវនាវប្រជាពលរដ្ឋទាំងអស់ចូលរួមលេងកម្សាន្តក្នុង«សង្ក្រាន្តបុរីអូរស្វាយសែនជ័យ»ឲ្យបានច្រើនកុះករ ដែលប្រព្រឹត្តធ្វើឡើងក្នុងរយៈពេល២ថ្ងៃ ចាប់ពីថ្ងៃទី០៤-០៥ មេសា ២០២៦។
ព្រឹត្តិការណ៍នេះមានរៀបចំកិច្ចបវេណីសាសនា ការលេងល្បែងប្រជាប្រិយខ្មែរ ការប្រគំតន្ត្រីសម័យ-បុរាណ ពិធីហែសង្ក្រាន្ត ឆៃយុាំ របាំត្រុដិ ហែខ្សែព្រ័ត្រ និងកម្មវិធីរាំកម្សាន្ត។
ល្បែងប្រជាប្រិយដែលរៀបចំរួមមាន៖ ល្បែងលោតការុងប្រណាំងគ្នា២ក្រុម ល្បែងបូមទឹកដាក់ដប២ក្រុម ល្បែងដណ្តើមស្លឹកឈើ ល្បែងប្រណាំងកង់យឺត ល្បែងវាយក្អម ល្បែងទូលក្អម ល្បែងចោលឈូង និងល្បែងទាញព្រ័ត្រ។
ព្រឹត្តិការណ៍នេះបានបង្ហាញពីភាពសម្បូរបែបនៃប្រពៃណីខ្មែរ និងការរួមចំណែករក្សាបេតិកភណ្ឌវប្បធម៌ជាតិឲ្យបន្តគង់វង្ស។
