រថយន្តហាយឡែនឌ័របុកម៉ូតូពីក្រោយនៅសៀមរាប បណ្តាលស្លាប់១របួស២

ខេត្តសៀមរាប៖ ហេតុការណ៍គ្រោះថ្នាក់ចរាចរណ៍ដ៏ធ្ងន់ធ្ងរបានកើតឡើងនៅស្រុកជីក្រែង នាំឱ្យមនុស្សម្នាក់ស្លាប់និងពីរនាក់ទៀតរងរបួសធ្ងន់ស្រាល។

ហេតុការណ៍នេះបានកើតឡើងនៅវេលាម៉ោង១៤:៣០នាទី ថ្ងៃទី០៤ ខែមេសា ឆ្នាំ២០២៦ នៅលើផ្លូវជាតិលេខ៦ ក្នុងភូមិយាង ឃុំឫស្សីលក ស្រុកជីក្រែង។ គ្រោះថ្នាក់នេះកើតឡើងដោយសាររថយន្តម៉ាក TOYOTA HIGHLANDER ពណ៌ទឹកមាស ផ្លាកលេខភ្នំពេញ 2U-3076 បានបុកម៉ូតូម៉ាក HONDA Dream ពណ៌ខ្មៅ ផ្លាកលេខសៀមរាប 1N-3177 ពីក្រោយ។

ជនរងគ្រោះក្នុងហេតុការណ៍នេះមាន៖
១. លោក ស៊ាង ស៊ន (៥៦ឆ្នាំ) អ្នកបើកបររថយន្ត របួសស្រាល
២. លោក ប៉ុង កក្ដដា (៣០ឆ្នាំ) អ្នកបើកបរម៉ូតូ របួសធ្ងន់
៣. លោកស្រី ធី វៃ (៥១ឆ្នាំ) អ្នករួមដំណើរស្លាប់

តាមការស៊ើបអង្កេតដំបូង មូលហេតុគឺអ្នកបើកបរម៉ូតូបានឈប់នៅលើផ្លូវ ធ្វើឱ្យអ្នកបើកបររថយន្តបុកពីក្រោយ។ បច្ចុប្បន្នជនជាប់ចោទទាំងពីរត្រូវបានបញ្ជូនទៅអធិការនគរបាលស្រុកជីក្រែងដើម្បីអនុវត្តនីតិវិធី។