ហ៊ូធីរួមដៃអ៊ីរ៉ង់-ហេសបូឡា វាយប្រហារអ៊ីស្រាអែលដោយមីស៊ីលចម្ងាយឆ្ងាយ

អន្តរជាតិ៖ កងកម្លាំងហ៊ូធីនៅយេម៉ែនបានប្រកាសថាពួកគេបានធ្វើប្រតិបត្តិការយោធាលើកទីប្រាំ ដោយសម្របសម្រួលជាមួយអ៊ីរ៉ង់ និងហេសបូឡា ដើម្បីវាយប្រហារគោលដៅសំខាន់ៗនៅអ៊ីស្រាអែល។

លោក Yahya Sarea អ្នកនាំពាក្យយោធាហ៊ូធី បានបញ្ជាក់ថា ប្រតិបត្តិការនេះបានកំណត់គោលដៅអាកាសយានដ្ឋាន Ben Gurion នៅទីក្រុង Tel Aviv រួមជាមួយគោលដៅយោធាសំខាន់ៗផ្សេងទៀតនៅភាគខាងត្បូងអ៊ីស្រាអែល។ ការវាយប្រហារនេះត្រូវបានអនុវត្តដោយប្រើមីស៊ីលផ្លោងចង្កោម និងយន្តហោះគ្មានមនុស្សបើក (UAV) ជាច្រើនគ្រឿង។

សេចក្តីថ្លែងការណ៍របស់ហ៊ូធីបង្ហាញពីការសម្របសម្រួលកាន់តែខ្លាំងឡើងរវាងក្រុមនេះនៅយេម៉ែន កងកម្លាំងអ៊ីរ៉ង់ និងហេសបូឡានៅលីបង់ ក្នុងជម្លោះជាមួយសហរដ្ឋអាមេរិក និងអ៊ីស្រាអែល។ អ៊ីស្រាអែលមិនទាន់បានបញ្ជាក់ពីការខូចខាតពីការវាយប្រហារនេះនៅឡើយទេ។