តម្លៃប្រេងអន្តរជាតិរីកឡើងខ្លាំង ដោយសារជម្លោះមជ្ឈិមបូព៌ាកំពុងតានតឹង

តម្លៃប្រេងអន្តរជាតិបន្តកើនឡើងខ្ពស់នៅទីផ្សារអាស៊ី ដោយសារកង្វល់ផ្គត់ផ្គង់ពីជម្លោះមជ្ឈិមបូព៌ារវាងអ៊ីស្រាអែល-សហរដ្ឋអាមេរិក និងអ៊ីរ៉ង់។ ទិន្នន័យពីទីភ្នាក់ងាររ៉យទ័របង្ហាញថា តម្លៃប្រេងកំពុងរីកឡើងយ៉ាងខ្លាំង។

តម្លៃប្រេងឆៅម៉ាក Brent កើនឡើង ១,៧១ ដុល្លារ (១,៦%) ទៅដល់ ១១០,៧៤ ដុល្លារ/បារ៉ែល នៅម៉ោង ៩ ព្រឹកទីក្រុងហុងកុង។ ចំណែកតម្លៃប្រេង WTI របស់អាមេរិកកើន ០,៧១ ដុល្លារ (០,៦%) ទៅ ១១២,២៥ ដុល្លារ/បារ៉ែល។

កាលពីថ្ងៃព្រហស្បតិ៍ ដែលជាថ្ងៃជួញដូរចុងក្រោយនៅសប្ដាហ៍មុន តម្លៃប្រេង Brent កើនឡើងជិត ៨% និង WTI កើន ១១% ក្រោយពេលប្រធានាធិបតីដូណាល់ ត្រាំប្ដេជ្ញាបន្តការវាយប្រហារអ៊ីរ៉ង់។

ច្រកសមុទ្រហ័រមូហ្ស ដែលជាផ្លូវដឹកជញ្ជូនប្រេងសំខាន់ពីអ៊ីរ៉ាក់ អារ៉ាប៊ីសាអូឌីត កាតា គុយវ៉ែត និងអារ៉ាប់រួម នៅតែជាប់គាំងស្ទើរតែស្រុងដោយសារកង្វល់សុវត្ថិភាព។ ក្រុមហ៊ុនចម្រាញ់ប្រេងកំពុងស្វែងរកប្រភពជំនួសពីអាមេរិកខាងជើង អាហ្វ្រិក និងអាមេរិកឡាទីន។

ជម្លោះនៅតែតានតឹង ដោយលោកត្រាំបានគំរាមអ៊ីរ៉ង់ឱ្យបើកច្រកហ័រមូហ្សត្រឹមថ្ងៃអង្គារ បើមិនដូច្នោះទេ អាមេរិកនឹងវាយប្រហារលើរោងចក្រថាមពល និងស្ពានរបស់ប្រទេសនេះ។

កាលពីសប្ដាហ៍មុន នាវាដឹកទំនិញបារាំង និងនាវាដឹកឧស្ម័នជប៉ុន បានឆ្លងកាត់ហ័រមូហ្សដោយសុវត្ថិភាព ដែលបង្ហាញពីគោលនយោបាយរបស់អ៊ីរ៉ង់ក្នុងការបើកច្រកសម្រាប់ប្រទេស«មិនមែនជាសត្រូវ»។