សម្ព័ន្ធមិត្តស្នើឲ្យអ៊ុយក្រែនឈប់វាយរោងចក្រប្រេងរុស្ស៊ី ដោយបារម្ភតម្លៃប្រេងហក់ឡើងខ្លាំង

ក្នុងពេលដែលសង្គ្រាមនៅតំបន់មជ្ឈិមបូព៌ាកំពុងឆាបឆេះយ៉ាងសន្ធោសន្ធៅ លោក Kyrylo Budanov ប្រធានការិយាល័យប្រធានាធិបតីអ៊ុយក្រែន បានបញ្ជាក់ថា បណ្ដាប្រទេសដៃគូអន្តរជាតិបានដាក់សំណើមកកាន់ទីក្រុងកៀវ ឲ្យផ្អាកការវាយប្រហារតាមអាកាសលើរោងចក្រចម្រាញ់ប្រេងរបស់រុស្ស៊ី។

យោងតាម Kyiv Post ដែលចុះផ្សាយនៅថ្ងៃទី៥ ខែមេសា ឆ្នាំ២០២៦ ការស្នើសុំនេះបានធ្វើឡើងដោយសារតែសហគមន៍អន្តរជាតិកំពុងព្រួយបារម្ភយ៉ាងខ្លាំងពីការឡើងថ្លៃនៃថាមពល ដែលបណ្ដាលមកពីភាពតានតឹងរវាងអាមេរិក-អ៊ីស្រាអែល និងអ៊ីរ៉ង់ ដែលកំពុងប៉ះពាល់ដល់ការផ្គត់ផ្គង់ប្រេងសកល។

លោក Budanov បានឆ្លើយតបដោយវិធីការទូតថា លោកពិតជាបានទទួល«សញ្ញា»ខ្លះៗពីបណ្ដាប្រទេសដៃគូ ប៉ុន្តែលោកមិនបានបញ្ជាក់ចំឈ្មោះប្រទេសណាមួយច្បាស់លាស់នោះទេ។ ស្ថានភាពបច្ចុប្បន្នមានភាពស្មុគស្មាញយ៉ាងខ្លាំង ព្រោះការឡើងថ្លៃប្រេងពិភពលោកបានក្លាយជាប្រភពចំណូលដ៏សំខាន់សម្រាប់ថវិកាសង្គ្រាមរបស់ក្រឹមឡាំង។

ទោះបីជាមានសម្ពាធពីខាងក្រៅក៏ដោយ ក៏យោធាអ៊ុយក្រែននៅតែបន្តធ្វើការវាយប្រហារដោយដ្រូនយ៉ាងជោគជ័យទៅលើរោងចក្រប្រេងសំខាន់ៗរបស់រុស្ស៊ីកាលពីចុងសប្ដាហ៍កន្លងទៅ។ ស្របពេលជាមួយគ្នានេះ គេក៏កំពុងរង់ចាំមើលលទ្ធផលនៃជំនួបជាមួយគណៈប្រតិភូជាន់ខ្ពស់របស់សហរដ្ឋអាមេរិក ដែលនឹងមកដល់ទីក្រុងកៀវក្នុងពេលឆាប់ៗនេះ។

លោកប្រធានាធិបតី ហ្សេលេនស្គី ក៏បានបង្ហាញព័ត៌មានដ៏គួរឲ្យព្រួយបារម្ភមួយទៀតថា រុស្ស៊ីកំពុងផ្ដល់ព័ត៌មានសម្ងាត់ និងទិន្នន័យពីផ្កាយរណបទៅឲ្យប្រទេសអ៊ីរ៉ង់ ដើម្បីជួយសម្រួលដល់ការវាយប្រហារលើទីតាំងថាមពលរបស់អ៊ីស្រាអែល។

ខណៈដែលមហាអំណាចលោកខាងលិចព្យាយាមទប់តម្លៃប្រេងឲ្យមានស្ថិរភាព អ៊ុយក្រែននៅតែប្រកាន់ជំហរថា ការវាយប្រហារលើហេដ្ឋារចនាសម្ព័ន្ធរុស្ស៊ី គឺជាការឆ្លើយតបដ៏ចាំបាច់បំផុត ចំពោះការដែលរុស្ស៊ីតែងតែបាញ់កម្ទេចបណ្ដាញអគ្គិសនីរបស់ខ្លួនស្ទើររាល់ថ្ងៃ។