By ភ្នំពេញ៖ ករណីគ្រោះថ្នាក់ចរាចរណ៍ធ្ងន់ធ្ងរបានកើតឡើងនៅយប់ថ្ងៃទី៥ មេសា ២០២៦ នៅមុខបុរីពិភពថ្មី អូលីក ផាត់ធូ ដោយរថយន្តឡិចសុីស 570 បុកម៉ូតូហុងដាឌ្រីមសេ១២៥ បណ្ដាលឲ្យម្ចាស់ម៉ូតូរងរបួសធ្ងន់។
គ្រោះថ្នាក់នេះកើតឡើងនៅម៉ោង ៨:៣០យប់ តាមបណ្ដោយផ្លូវបេតុងមុខបុរីពិភពថ្មី ក្នុងសង្កាត់ក្រាំងធ្នង់ ខណ្ឌសែនសុខ។ ប្រភពពីកន្លែងកើតហេតុបានឲ្យដឹងថា រថយន្តឡិចសុីស 570 ព័ណ៌ខ្មៅ លេខផ្លាកភ្នំពេញ 2CF-8765 បានបុកម៉ូតូហុងដាឌ្រីមសេ១២៥ លេខផ្លាក 1AS-0918 បណ្ដាលឲ្យម្ចាស់ម៉ូតូរងរបួសធ្ងន់។
ក្រោយកើតហេតុ សមត្ថកិច្ចមូលដ្ឋាននិងជំនាញខណ្ឌបានចុះមកដល់ទីតាំងកន្លែងកើតហេតុ ដើម្បីធ្វើការសម្របសម្រួលរវាងភាគីទាំងពីរ។ បច្ចុប្បន្ន ករណីនេះកំពុងស្ថិតក្រោមការស៊ើបអង្កេតរបស់សមត្ថកិច្ច។
អ្នកសារព័ត៌មានបានឃើញថា រថយន្តឡិចសុីសមានសភាពខូចខាតខ្លះនៅផ្នែកខាងមុខ ខណៈម៉ូតូត្រូវបានខូចខាតយ៉ាងធ្ងន់ធ្ងរ។ សមត្ថកិច្ចបានជួយដកយកយានជំនិះទាំងពីរចេញពីកន្លែងកើតហេតុ និងរៀបចំឲ្យម្ចាស់ម៉ូតូទៅព្យាបាលនៅមន្ទីរពេទ្យ។
សូមអ្នកបើកបរទាំងអស់ប្រុងប្រយ័ត្ន និងគោរពច្បាប់ចរាចរណ៍ ដើម្បីជៀសវាងគ្រោះថ្នាក់ដែលអាចកើតមានឡើង។
ដោយ៖ ចន្ទ លីហ្សា
