By ប្រទេសថៃកំពុងប្រឈមមុខនឹងរលកកម្តៅធ្ងន់ធ្ងរបំផុតនៅពេលនេះ ដោយសីតុណ្ហភាពនឹងហក់ឡើងលើសពី ៤២°C នៅពេលបុណ្យចូលឆ្នាំថ្មីខាងមុខ។
នាយកដ្ឋានឧតុនិយមថៃបានចេញការព្រមានយ៉ាងអាសន្ន ដោយបង្ហាញថា អាកាសធាតុនៅតំបន់ភាគច្រើននៃប្រទេសនឹងក្តៅហួតហែងខ្លាំង ហើយតំបន់ខ្លះទៀតនឹងត្រូវគ្របដណ្តប់ដោយផ្សែងពុលដែលធ្វើឲ្យស្ថានភាពកាន់តែអាក្រក់។
យោងតាមការព្រមានថ្មីៗ ភាគខាងជើង ឦសាន និងតំបន់កណ្តាលនឹងរងគ្រោះខ្លាំងជាងគេ ដោយមានការព្យាករណ៍ថា សន្ទស្សន៍កម្តៅ (Heat Index) អាចឈានដល់ ៦០°C ដែលជាកម្រិតគ្រោះថ្នាក់ខ្លាំង។
ក្រសួងសេដ្ឋកិច្ច និងសង្គមឌីជីថល (DES) បានព្រមានបន្ថែមថា ស្ថានភាពនេះគឺជាហានិភ័យខ្ពស់បំផុតសម្រាប់ក្រុមមនុស្សងាយរងគ្រោះ រួមមាន៖ មនុស្សចាស់ កុមារ ស្ត្រីមានផ្ទៃពោះ និងអ្នកដែលមានជំងឺប្រចាំកាយ។
ទោះបីជាមានកម្តៅខ្លាំងក៏ដោយ ក៏អាចមានបាតុភូតផ្គររន្ទះ និងខ្យល់កន្ត្រាក់នៅតំបន់ខ្លះផងដែរ ដែលធ្វើឲ្យស្ថានភាពអាកាសធាតុកាន់តែស្មុគស្មាញ។
ជាក់ស្តែង ទីក្រុងឈៀងម៉ៃត្រូវបានចាត់ថ្នាក់ជាទីក្រុងដែលមានខ្យល់ពុលធ្ងន់ធ្ងរបំផុតលំដាប់ទី២ នៅលើពិភពលោក ដែលបន្ថែមលើស្ថានភាពរលកកម្តៅដ៏គ្រោះថ្នាក់។
អាជ្ញាធរថៃបានផ្តល់អនុសាសន៍ដល់ប្រជាពលរដ្ឋឱ្យជៀសវាងការធ្វើដំណើរនៅពេលថ្ងៃ និងរក្សាសីតុណ្ហភាពខ្លួនប្រាណឱ្យបានត្រជាក់ ជាពិសេសសម្រាប់ក្រុមងាយរងគ្រោះ។
