By ព្រះសីហនុ៖ នាវាយុទ្ធភណ្ឌកងទ័ពជើងទឹកសហព័ន្ធរុស្ស៊ីចំនួន២គ្រឿង បានចូលសំចតនៅកំពង់ផែស្វយ័តក្រុងព្រះសីហនុដោយសុវត្ថិភាព ក្នុងគោលបំណងពង្រឹងទំនាក់ទំនងមិត្តភាព និងសហប្រតិបត្តិការយោធារវាងប្រទេសទាំងពីរ។
ការទស្សនកិច្ចនេះមានរយៈពេល៣ថ្ងៃ ចាប់ពីថ្ងៃទី៦ ដល់ថ្ងៃទី៨ ខែមេសា ឆ្នាំ២០២៦។ នាវាទាំងពីរត្រូវបានទទួលស្វាគមន៍ដោយថ្នាក់ដឹកនាំកងទ័ពជើងទឹកមូលដ្ឋានសមុទ្ររាម ដែលដឹកនាំដោយលោកឧត្តមនាវីត្រី អ៊ិន សុខេ មរ៉ា មេបញ្ជាការរងមូលដ្ឋានសមុទ្ររាម។
នាវាទី១មានឈ្មោះ SOVERSHENNYY លេខ៣៣៣ ទម្ងន់ផ្ទុក២.២៥០តោន មានបណ្ដោយ១០២.៥ម៉ែត្រ ទទឹង១៣ម៉ែត្រ និងមាននាវឹកចំនួន១២៩នាក់ ដឹកនាំដោយលោកវរនាវីឯក SHMAGIN Artem។ នាវាទី២មានឈ្មោះ REZKIY លេខ៣៤៣ មានទម្ងន់ផ្ទុកស្រដៀងគ្នា និងមាននាវឹក១២៦នាក់ ដឹកនាំដោយលោកវរនាវីឯក KOVALEY EVGENII។
ក្នុងអំឡុងពេលស្នាក់នៅ គណៈប្រតិភូរុស្ស៊ីមានគម្រោងជួបសម្ដែងការគួរសមជាមួយថ្នាក់ដឹកនាំមូលដ្ឋានសមុទ្ររាម ថ្នាក់ដឹកនាំខេត្តព្រះសីហនុ និងក្រសួងការពារជាតិ។ ពួកគេនឹងមានកម្មវិធីជប់លៀងនៅលើនាវា ព្រមទាំងការលេងកីឡាមិត្តភាពរវាងកងទ័ពជើងទឹកទាំងពីរ។
ការទស្សនកិច្ចនេះជាឱកាសសំខាន់ក្នុងការរឹតចំណងមិត្តភាព និងសហប្រតិបត្តិការយោធារវាងកម្ពុជា និងរុស្ស៊ី ដែលនឹងជំរុញឱ្យទំនាក់ទំនងរវាងប្រជាជនទាំងពីរកាន់តែជិតស្និទ្ធឡើង។
