ប្រវត្តិសាស្ត្រថ្មី! អវកាសយានិកស្ត្រីអាមេរិកធ្វើដំណើរជុំវិញព្រះច័ន្ទបន្ទាប់ពីជាង៥០ឆ្នាំ

អវកាសយានិកស្ត្រីអាមេរិក លោកស្រី Christina Koch កំពុងបង្កើតប្រវត្តិសាស្ត្រថ្មីជាស្ត្រីដំបូងគេដែលធ្វើដំណើរជុំវិញឋានព្រះច័ន្ទ ក្នុងបេសកកម្ម Artemis II របស់ NASA ដែលជាលើកទីមួយក្នុងរយៈពេលជាង៥០ឆ្នាំ។

យោងតាមសារព័ត៌មាន ABC News លោកស្រី Koch អាយុ ៤៧ឆ្នាំ ជាម្នាក់ក្នុងចំណោមមនុស្ស៤នាក់ដែលនឹងហោះហើរជាមួយយានអវកាស Orion សម្រាប់បេសកកម្ម Artemis II របស់ NASA។ យានអវកាសនេះនឹងត្រូវបានបាញ់បង្ហោះទៅឋានព្រះច័ន្ទនៅល្ងាចថ្ងៃពុធពីមជ្ឈមណ្ឌលអវកាស Kennedy ក្នុងរដ្ឋ Florida ក្នុងរយៈពេល១០ថ្ងៃនៃបេសកកម្ម។

ដំណើរដ៏វែងឆ្ងាយជាង១.១លានគីឡូម៉ែត្រនេះ ជាលើកទីមួយក្នុងរយៈពេលជាង៥០ឆ្នាំសម្រាប់អវកាសយានិកអាមេរិកធ្វើដំណើរជុំវិញឋានព្រះច័ន្ទ។ ក្រៅពីលោកស្រី Koch បេសកកម្មនេះក៏មានអវកាសយានិកដទៃទៀតរបស់ NASA ជាជនជាតិអាមេរិកគឺលោក Reid Wiseman និងលោក Victor Glover ព្រមទាំងអវកាសយានិករបស់ទីភ្នាក់ងារអវកាសកាណាដា លោក Jeremy Hansen ម្នាក់ផងដែរ។

លោកស្រី Koch កើតរដ្ឋ Michigan និងធំធាត់រដ្ឋ North Carolina ហើយត្រូវបានជ្រើសរើសជាលើកដំបូងជាអវកាសយានិក NASA ក្នុងឆ្នាំ២០១៣។ នៅក្នុងខែធ្នូឆ្នាំ២០១៩ លោកស្រីបង្កើតកំណត់ត្រាសម្រាប់ការហោះហើរអវកាសយូរបំផុត ដោយចំណាយពេល៣២៨ថ្ងៃជាប់ៗគ្នានៅក្នុងលំហ។

អ្នកជំនាញកត់ចំណាំថា ចំណុចសំខាន់ៗមួយចំនួនពីបេសកកម្មរបស់លោកស្រី Koch រួមមានការធ្វើមនុស្សយន្តដល់ភ្នាក់ងារ Alpha Magnetic Spectrometer ការដាំដុះគ្រីស្តាល់ប្រូតេអ៊ីនសម្រាប់ការស្រាវជ្រាវឱសថ និងការសាកល្បងម៉ាស៊ីនបោះពុម្ពជីវសាស្ត្រ៣D ក្នុងមីក្រូទំនាញ។

មុនទទួលភារកិច្ច Artemis II លោកស្រីបម្រើការជាប្រធានក្រុមចាត់តាំងក្នុងការិយាល័យអវកាសយានិករបស់ NASA និងជាជំនួយការសម្រាប់សមាហរណកម្មបច្ចេកទេសសម្រាប់នាយកមជ្ឈមណ្ឌលនៅមជ្ឈមណ្ឌលអវកាសទៀតផង។

លោកស្រី Koch ទទួលបានសញ្ញាបត្របរិញ្ញាបត្រវិទ្យាសាស្ត្រផ្នែកវិស្វកម្មអគ្គិសនីនិងរូបវិទ្យា ក៏ដូចជាសញ្ញាបត្រអនុបណ្ឌិតវិទ្យាសាស្ត្រផ្នែកវិស្វកម្មអគ្គិសនីពីសាកលវិទ្យាល័យរដ្ឋ North Carolina សហរដ្ឋអាមេរិក។