កម្លាំងនគរបាលស្រុកកៀនស្វាយឃាត់ខ្លួនក្មេងទំនើង ១០នាក់ ក្រោយបង្ហោះម៉ូតូនិងកាន់ដុំថ្ម

ខេត្តកណ្ដាល – កម្លាំងនគរបាលស្រុកកៀនស្វាយបានធ្វើប្រតិបត្តិការបង្ក្រាបក្មេងទំនើងចំនួន ១០នាក់ ក្រោយពួកគេបង្ហោះម៉ូតូនិងកាន់ដុំថ្មតាមបណ្តោយផ្លូវជាតិលេខ១។

ហេតុការណ៍នេះបានកើតឡើងនៅយប់ថ្ងៃទី៦ ខែមេសា ឆ្នាំ២០២៦ វេលាម៉ោង២៣:០៥នាទី នៅតាមបណ្តោយផ្លូវជាតិលេខ១ ឃុំដីឥដ្ឋ ស្រុកកៀនស្វាយ។ កម្លាំងនគរបាលបានឃាត់ខ្លួនក្រុមក្មេងទំនើងដែលកំពុងជិះម៉ូតូ៦គ្រឿង និងមានអាកប្បកិរិយាបង្ហោះម៉ូតូដោយកាន់ដុំថ្ម។

ក្មេងទំនើងទាំង១០នាក់មានអាយុចន្លោះពី១៣ទៅ២០ឆ្នាំ ដែលក្នុងនោះមានសិស្ស កម្មកររោងចក្រ និងអ្នកដឹកគ្រឿងសំណង់។ ក្មេងទាំងនេះត្រូវបានឃាត់ខ្លួនក្រោយពីពួកគេបានចេញពីការផឹកស្រាបៀននៅផ្ទះមួយ រួចបបួលគ្នាជិះម៉ូតូទៅតំបន់ជុំវិញវត្តខ្សុំ។

វត្ថុតាងដែលត្រូវបានចាប់យករួមមាន៖ ម៉ូតូ៥គ្រឿង (ម៉ាក HONDA C125 និង NEX) ទូរស័ព្ទដៃ៣គ្រឿង (iPhone ១១, iPhone XS MAX និង Tecno) និងដុំថ្ម៦ដុំ។ ក្មេងទាំងអស់ត្រូវបានធ្វើតេស្តសារធាតុញៀន ហើយលទ្ធផលអវិជ្ជមាន។

នៅចំពោះមុខនគរបាល ក្មេងទំនើងទាំងនេះបានសារភាពថា ពួកគេរើសដុំថ្មមកកាន់ដោយសារការភ័យខ្លាចបក្សពួកផ្សេងមកវាយពួកគេក្នុងពេលបង្ហោះម៉ូតូ។ ក្រោយពីការសាកសួរ កម្លាំងជំនាញបានសុំមតិដឹកនាំបន្ត និងនឹងអនុវត្តតាមច្បាប់។