By ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានបញ្ជាឱ្យអាជ្ញាធរខណ្ឌទាំង១៤ ត្រូវពង្រឹងការរក្សាសន្តិសុខ សុវត្ថិភាពជូនប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិ ដើម្បីធានាបាននូវភាពសប្បាយរីករាយគ្មានហានិភ័យ។
ក្នុងកិច្ចប្រជុំត្រៀមកម្លាំងការពារសន្តិសុខសុវត្ថិភាពជូនពលរដ្ឋ និងរៀបចំព្រឹត្តិការណ៍ “នគរសង្ក្រាន្ត” ដែលរៀបចំឡើងដោយសហភាពសហព័ន្ធយុវជនកម្ពុជា សហការជាមួយរដ្ឋបាលរាជធានីភ្នំពេញ កាលពីថ្ងៃទី០៦ ខែមេសា ឆ្នាំ២០២៦ លោកអភិបាលបានចេញបញ្ជាការណ៍សំខាន់ៗ។
លោក ឃួង ស្រេង បានបញ្ជាក់ថា៖ “នៅរាជធានីភ្នំពេញ មានវត្តអារាមចំនួន១៥១វត្ត ប្រជាពលរដ្ឋអាចដើរលេងកម្សាន្តនៅរមណីយដ្ឋានវប្បធម៌ប្រវត្តិសាស្ត្រវត្តភ្នំ និងតំបន់សប្បាយភាព៥ទីតាំងទៀត។ សូមអាជ្ញាធរខណ្ឌទាំង១៤ និងកងកម្លាំងមានសមត្ថកិច្ចទាំងអស់ យកចិត្តទុកដាក់ឱ្យបានខ្ពស់លើការរក្សាសន្តិសុខសុវត្ថិភាព។”
ក្រៅពីការងាររក្សាសន្តិសុខសុវត្ថិភាព លោកអភិបាលក៏បានណែនាំឱ្យអាជ្ញាធរផ្សព្វផ្សាយណែនាំដល់ក្រុមហ៊ុនឯកជន តាមភោជនីយដ្ឋាន និងស្ថាប័នពាក់ព័ន្ធ រៀបចំតុបតែងតាំងលម្អរភ្លើងព័ណ៌ទង់ជាតិ និងណែនាំប្រជាពលរដ្ឋដាក់ទង់ជាតិគ្រប់ផ្ទះ។
ព្រឹត្តិការណ៍ “នគរសង្ក្រាន្ត” នឹងធ្វើឡើងក្នុងរយៈពេល៦ថ្ងៃ ចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ នៅតំបន់ជុំវិញវត្តភ្នំ សួនច្បារវឌ្ឍនៈ ស្ពាននាគភ្លោះ ផ្លូវថ្មើរជើងចតុមុខ បាសាក់លែន និងផ្លូវ១៥៥។
កម្មវិធីនឹងមានពិធីទទួលទេវតាឆ្នាំថ្មី ដង្ហែក្បួននគរសង្ក្រាន្ត ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងទស្សនីយភាពសិល្បៈវប្បធម៌ លេងល្បែងប្រជាប្រិយជាតិ និងការតាំងពិព័រណ៍ផលិតផលក្នុងស្រុក។
រដ្ឋបាលរាជធានីភ្នំពេញ បានអំពាវនាវដល់ប្រជាពលរដ្ឋពីគ្រប់មជ្ឈដ្ឋាន សូមអញ្ជើញមកចូលរួមទស្សនាកម្សាន្តក្នុងព្រឹត្តិការណ៍ “នគរសង្ក្រាន្ត” ឱ្យបានច្រើនកុះករ ក្រោមម្លប់សន្តិភាពដ៏ត្រជាក់ត្រជំ។
ក្នុងនោះដែរ អាជ្ញាធរខណ្ឌត្រូវណែនាំប្រជាពលរដ្ឋមុនចេញពីផ្ទះត្រូវពន្លត់ភ្លើងទៀនធូប បិទភ្លើងដើម្បីទប់ស្កាត់គ្រោះថ្នាក់អគ្គិភ័យ និងគិតគូរពីការប្រមូលសំរាមនៅទីតាំងសប្បាយភាពទាំងអស់។
ដោយ៖ សំរិត
