By អវកាសយានិកទាំង៤នាក់នៃបេសកកម្ម Artemis II របស់ NASA បានបង្កើតប្រវត្តិសាស្ត្រថ្មី ដោយក្លាយជាមនុស្សដំបូងគេដែលធ្វើដំណើរឆ្ងាយជាងគេពីភពផែនដី លើសពីកំណត់ត្រាចាស់របស់ Apollo 13 កាលពី៥៦ឆ្នាំមុន។
តាមការប្រកាសផ្លូវការរបស់ NASA នៅថ្ងៃអង្គារទី៧ ខែមេសា ឆ្នាំ២០២៦ យានអវកាស Orion បានទៅដល់ចម្ងាយអតិបរមាប្រហែល ៤០៦,៨០០ គីឡូម៉ែត្រពីផែនដី ខណៈកំណត់ត្រាថ្មីត្រូវបានចារជាប្រវត្តិសាស្ត្រនៅម៉ោង ៧:០២ យប់ (ម៉ោងអាមេរិក)។
ក្រុមអវកាសយានិកទាំងនេះបានក្លាយជាមនុស្សដំបូងគេដែលមើលឃើញផ្ទៃខាងក្រោយនៃព្រះចន្ទដោយផ្ទាល់ភ្នែក ហើយអ្វីដែលកាន់តែអស្ចារ្យគឺពួកគេក៏បានទស្សនាសូរ្យគ្រាសពេញលេញផងដែរ ដែលបាតុភូតនេះមិនអាចមើលឃើញបានឡើយពីភពផែនដី។
មុនពេលទៅដល់ចំណុចកំណត់ត្រា ក្រុមការងារបានទទួលសារជាសំឡេងដែលថតទុកពីលោក Jim Lovell ជាមេបញ្ជាការ Apollo 13 ដែលបានទទួលមរណភាពនៅឆ្នាំ២០២៥។ លោកបានស្វាគមន៍ពួកគេមកកាន់តំបន់ចាស់របស់លោក និងជូនពរឲ្យពួកគេទទួលបានជោគជ័យ។
Artemis II គឺជាបេសកកម្មហោះហើរជុំវិញព្រះចន្ទ ដោយនាំមនុស្សទៅកាន់ផ្នែកម្ខាងទៀតនៃព្រះចន្ទ (Far side of the Moon) ជាលើកដំបូងចាប់តាំងពីយុគសម័យ Apollo។ ខុសពី Apollo 13 ដែលត្រូវបង្ខំចិត្តហោះក្នុងគន្លងនេះដោយសារបញ្ហាបច្ចេកទេសអាសន្ន, Artemis II បានសម្រេចចម្ងាយនេះតាមផែនការដែលបានកំណត់ទុកជាមុន។
ការសម្រេចចិត្តនេះបង្ហាញពីការរីកចម្រើនយ៉ាងខ្លាំងនៃបច្ចេកវិទ្យាអវកាសក្នុងរយៈពេលជាងកន្លះសតវត្សរ៍ និងបើកផ្លូវសម្រាប់ការត្រឡប់មកព្រះចន្ទវិញនាពេលអនាគត។
