By ភ្នំពេញ៖ ប្រទេសកូរ៉េខាងជើងបានបង្ហាញអាកប្បកិរិយាទន់ភ្លន់យ៉ាងចម្លែក ដោយសរសើរប្រធានាធិបតីកូរ៉េខាងត្បូង លោក លី ជេម្យុង បន្ទាប់ពីលោកចេញមុខសុំទោសពីរឿងដ្រូនឆ្លងដែន។
ការសរសើរនេះកើតឡើងក្រោយពីលោក លី ជេម្យុង សម្តែងការសោកស្តាយចំពោះករណីដ្រូនកូរ៉េខាងត្បូងហោះចូលទឹកដីកូរ៉េខាងជើង ដែលជាការសម្របសម្រួលដ៏កម្រនៅពេលប្រទេសទាំងពីរមានទំនាក់ទំនងតានតឹង។
លោកប្រធានាធិបតី លី បានបញ្ជាក់ថា ករណីដ្រូនឆ្លងដែនយ៉ាងតិច២លើកគឺជាទង្វើរបស់បុគ្គលស៊ីវិលដែលបំពានគោលការណ៍រដ្ឋាភិបាល ហើយលោកហៅសកម្មភាពនេះថា «ការបះបោរ» ប្រឆាំងនឹងប្រទេសជាតិ។
អ្នកស្រី គីម យ៉ូជុង ប្អូនស្រីរបស់លោក គីម ជុងអ៊ុន បានចេញសេចក្តីថ្លែងការណ៍តាមរយៈ KCNA ដោយលើកឡើងថា រដ្ឋាភិបាលកូរ៉េខាងជើងចាត់ទុកសម្តីរបស់លោក លី ថាជាការបង្ហាញនូវចរិតលក្ខណៈរបស់ «បុរសស្មោះត្រង់ និងមានចិត្តទូលាយ»។
សារទន់ភ្លន់នេះធ្វើឲ្យពិភពលោកចាប់អារម្មណ៍ ព្រោះវាខុសពីការវាយប្រហារតាមសម្តីដែលកូរ៉េខាងជើងធ្លាប់ធ្វើកាលពីមុន។ ចាប់តាំងពីលោក លី ឡើងកាន់តំណែង លោកតែងតែព្យាយាមលើកកម្ពស់សន្តិភាព និងស្តារទំនាក់ទំនងរវាងប្រទេសទាំងពីរ។
