ប្រធានសភាអ៊ីរ៉ង់ព្រមាន ត្រាំកំពុងអូសទាញអាមេរិកចូលឋាននរក

ប្រធានសភាអ៊ីរ៉ង់ លោក Mohammad Baqer Qalibaf បានចេញមុខឆ្លើយតបយ៉ាងខ្លាំងក្លាទៅនឹងការគំរាមកំហែងរបស់ប្រធានាធិបតីអាមេរិក ដូណាល់ ត្រាំ ដោយថា សង្គ្រាមរបស់លោកត្រាំជាមួយអ៊ីរ៉ង់កំពុងធ្វើឲ្យជីវិតជនជាតិអាមេរិកសាមញ្ញកាន់តែអាក្រក់ដូច «ចូលទៅក្នុងឋាននរក»។

ការប្រកាសនេះបានធ្វើឡើងបន្ទាប់ពីលោកត្រាំបានបង្ហោះពាក្យអសុរោះនៅលើបណ្ដាញសង្គម Truth Social កាលពីថ្ងៃអាទិត្យ ដោយព្រមានថា អ៊ីរ៉ង់នឹង «រស់នៅក្នុងនរក» លុះត្រាតែច្រកសមុទ្រ Hormuz ត្រូវបានបើកឡើងវិញសម្រាប់ការដឹកជញ្ជូន។ លោកត្រាំក៏បានគំរាមកំហែងថានឹងទម្លាក់គ្រាប់បែកលើរោងចក្រថាមពល និងស្ពានរបស់អ៊ីរ៉ង់។

នៅលើបណ្ដាញសង្គម X លោក Qalibaf បានសរសេរជំរុញឲ្យមេដឹកនាំអាមេរិកបញ្ចប់ «ល្បែងគ្រោះថ្នាក់» ដោយសំដៅទៅលើនាយករដ្ឋមន្ត្រីអ៊ីស្រាអែល Benjamin Netanyahu ថា៖ «ចលនាមិនប្រុងប្រយ័ត្នរបស់អ្នកកំពុងអូសទាញអាមេរិកចូលទៅក្នុងឋាននរកដ៏រស់រវើកសម្រាប់គ្រួសារនីមួយៗ»។

លោក Qalibaf បានសង្កត់ធ្ងន់ទៀតថា៖ «កុំយល់ច្រឡំ អ្នកនឹងមិនទទួលបានអ្វីតាមរយៈឧក្រិដ្ឋកម្មសង្គ្រាមនោះទេ»។

ដោយឡែក លោក Mikhail Ulyanov បេសកជនរុស្ស៊ីប្រចាំអង្គការអន្តរជាតិនៅទីក្រុងវីយែន បានលើកឡើងថា ទីក្រុងវ៉ាស៊ីនតោនមិនយល់ថា ទីក្រុងតេហេរ៉ង់នឹងទទួលយកតែកិច្ចព្រមព្រៀងដែលផ្អែកលើ «ការសម្របសម្រួលសមហេតុផល» មិនមែនជាឱសានវាទទេ។

ព័ត៌មាននេះត្រូវបានផ្សព្វផ្សាយដោយទីភ្នាក់ងារសារព័ត៌មាន RT នៅថ្ងៃទី៦ មេសា។