By ភ្នំពេញ៖ អតិជនម្នាក់បានចោទប្រកាន់ក្រុមហ៊ុនផ្តល់សេវាដាក់បុគ្គលិកធ្វើការតាមផ្ទះយីហោ “ឃ្លេវើ ឃ្លីនឡូខល” ថាបានបោកប្រាស់ខ្លួនដោយទទួលប្រាក់ជាង ១,០០០ដុល្លារ ប៉ុន្តែមិនផ្តល់សេវាតាមកិច្ចសន្យា។
លោក ធីម ម៉េងសុង អតិជនរូបនេះ បានរៀបរាប់ប្រាប់អង្គភាពកាសែតនគរវត្ត និងគេហទំព័រនគរដ្រេហ្គន នៅថ្ងៃទី០៧ មេសា ឆ្នាំ២០២៦ ថា លោកបានជួលសេវាក្រុមហ៊ុន “ឃ្លេវើ ឃ្លីនឡូខល” ពីបុគ្គលឈ្មោះ ឆន ធារិទ្ធ ដែលជាម្ចាស់ក្រុមហ៊ុន ដើម្បីដាក់បុគ្គលិកធ្វើការផ្ទះផ្នែកអនាម័យ។
លោកបានបង់ប្រាក់មុនចំនួន ១,០៨០ដុល្លារ សម្រាប់សេវារយៈពេល ១ឆ្នាំ ចាប់ពីថ្ងៃទី០៣ ធ្នូ ២០២៥ ដល់ថ្ងៃទី០៣ ធ្នូ ២០២៦ ក្នុងតម្លៃ ២៧០ដុល្លារក្នុងមួយខែ។ ក្រុមហ៊ុនបានផ្តល់បុគ្គលិកឈ្មោះ សួន រចនា ឱ្យមកធ្វើការ ប៉ុន្តែបុគ្គលិកនេះធ្វើការត្រឹមតែ ២ខែប៉ុណ្ណោះ។
“ខ្ញុំបានស្នើសុំឱ្យក្រុមហ៊ុនប្ដូរបុគ្គលិកផ្សេង ប៉ុន្តែពួកគាត់សន្យាហើយមិនទទួលខុសត្រូវ រហូតមិនព្រមដាក់បុគ្គលិកមកឱ្យវិញ” លោក ធីម ម៉េងសុង បានថ្លែង។
លោកបានទាមទារឱ្យក្រុមហ៊ុនទូទាត់ប្រាក់ដែលនៅសល់ចំនួន ៥០៤ដុល្លារ ប៉ុន្តែបុគ្គលឈ្មោះ ឆន ធារិទ្ធ បានសន្យាថានឹងផ្ទេរប្រាក់នៅថ្ងៃទី២៧ មីនា ក្រោយមកលើកទៅថ្ងៃទី០៧ មេសា ហើយទីបំផុតក៏មិនបានផ្ទេរប្រាក់ត្រលប់មកវិញ។
ដោយមានការខកចិត្តយ៉ាងខ្លាំង លោក ធីម ម៉េងសុង បានសម្រេចទៅដាក់ពាក្យបណ្ដឹងនៅអាជ្ញាធរមានសមត្ថកិច្ច ដើម្បីដោះស្រាយតាមផ្លូវច្បាប់។
អង្គភាពកាសែតនគរវត្ត និងគេហទំព័រនគរដ្រេហ្គន បានទំនាក់ទំនងទៅបុគ្គលឈ្មោះ ឆន ធារិទ្ធ ដែលបានអះអាងថា លោកពិតជាបានសន្យាផ្ទេរប្រាក់ ប៉ុន្តែដោយសារការផ្ទេរប្រាក់មិនទាន់មានលិទ្ធភាព ទើបស្នើសុំលើកថ្ងៃទៅថ្ងៃទី០៧ មេសា។
អតិជនដែលរងគ្រោះបានអំពាវនាវឱ្យពលរដ្ឋប្រយ័ត្នក្នុងការជួលសេវាពីក្រុមហ៊ុននេះ ដោយសារតែពួកគេមានចរិតទុច្ចរិត ភូតភរ និងគ្មានភាពទទួលខុសត្រូវចំពោះអតិជន។
រឿងនេះបង្ហាញពីគ្រោះថ្នាក់នៃការជួលសេវាពីក្រុមហ៊ុនដែលគ្មានភាពជឿជាក់ និងជាការរំលឹកដល់អ្នកប្រើប្រាស់សេវាទាំងឡាយឱ្យប្រុងប្រយ័ត្នក្នុងការជួលសេវាពីក្រុមហ៊ុនណាមួយ។
ដោយ៖ តារា
