By ភ្នំពេញ៖ គ្រោះអគ្គិភ័យធំមួយបានកើតឡើងនៅរាជធានីភ្នំពេញ កាលពីថ្ងៃទី៦ ខែមីនា ឆ្នាំ២០២៦ នៅពេលឃ្លាំងតំឡើងគ្រឿងតុបតែងឆាក និងកម្មវិធីចំនួន ៣ ត្រូវបានអគ្គិភ័យឆាបឆេះយ៉ាងខ្លាំង។
ហេតុការណ៍នេះបានកើតឡើងនៅម៉ោង ៦:២០ ល្ងាច នៅចំណុចដីឡូត៍ B01 ផ្លូវបេតុង ១ឧសភា ស្ថិតក្នុងភូមិច្រេស សង្កាត់គោកឃ្លាង ខណ្ឌសែនសុខ។ តាមការអះអាងពីប្រភពព័ត៌មាន មុនពេលកើតហេតុ គេបានឮសំឡេងផ្ទុះមួយចេញពីផ្នែកខាងត្បូងនៃឃ្លាំង ហើយបន្តិចក្រោយមក អណ្តាតភ្លើងក៏ឆាបឆេះឡើងភ្លាមៗ។
កម្មករនៅក្នុងឃ្លាំងបានព្យាយាមយកបំពង់ពន្លត់អគ្គិភ័យមកបាញ់ ប៉ុន្តែមិនអាចគ្រប់គ្រងបាន ទើបរាយការណ៍ទៅកាន់សមត្ថកិច្ច។ ក្រោយទទួលព័ត៌មាន រថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញ បានចេញអន្តរាគមន៍ភ្លាមៗ។
ការអន្តរាគមន៍នេះក៏មានការចូលរួមពីរថយន្តជំនួយរបស់ក្រុមហ៊ុនឯកជន និងកងរាជអាវុធហត្ថរាជធានីភ្នំពេញផងដែរ។ សមត្ថកិច្ចសង្ស័យថា ហេតុការណ៍នេះប្រហែលមកពីចរន្តអគ្គិសនីខូច។
ចំពោះការខូចខាត ជំហានបឋមបានបញ្ជាក់ថា ឃ្លាំង ២ ក្នុងចំណោម ៣ ឃ្លាំង ត្រូវបានបំផ្លាញទាំងស្រុង ខណៈរថយន្ត ៣ គ្រឿង និងម៉ូតូ ៣ គ្រឿង ត្រូវបានឆេះអស់។ សមត្ថកិច្ចកំពុងស៊ើបអង្កេតហេតុផលពិតប្រាកដនៃគ្រោះភ្លើងឆេះនេះ។
ដោយ៖ សុខាសែនជ័យ
