By ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រួមជាមួយលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានចាកចេញពីភ្នំពេញនៅព្រឹកថ្ងៃច័ន្ទនេះ ដើម្បីចូលរួមកិច្ចប្រជុំកំពូលស្តីពីសុខភាពតែមួយ (One Health Summit) នៅទីក្រុងលីយ៉ុង ប្រទេសបារាំង។
កិច្ចប្រជុំដ៏សំខាន់នេះនឹងប្រព្រឹត្តទៅពីថ្ងៃទី៦ ដល់ថ្ងៃទី៩ ខែមេសា ឆ្នាំ២០២៦ ដោយមានការអញ្ជើញពីលោក អេម៉ានុយអែល ម៉ាក្រុង ប្រធានាធិបតីបារាំង។ នេះគឺជាកិច្ចប្រជុំកំពូលលើកទី៩ នៃកិច្ចប្រជុំកំពូលស្តីពីភពផែនដីតែមួយ។
អមដំណើរសម្តេចធិបតីនាយករដ្ឋមន្ត្រី រួមមានលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ ព្រមទាំងឧបនាយករដ្ឋមន្ត្រី រដ្ឋមន្ត្រី និងមន្ត្រីជាន់ខ្ពស់ផ្សេងទៀត។
កិច្ចប្រជុំនេះជាវេទិកាកម្រិតខ្ពស់សម្រាប់ការពិភាក្សាបញ្ហាសុខភាពដែលពាក់ព័ន្ធនឹងមនុស្ស សត្វ និងប្រព័ន្ធអេកូឡូស៊ី ដោយមានការចូលរួមពីប្រមុខរដ្ឋ តំណាងអង្គការអន្តរជាតិ អ្នកវិទ្យាសាស្ត្រ និងធនាគារអភិវឌ្ឍន៍។
ក្នុងអំឡុងពេលស្នាក់នៅប្រទេសបារាំង សម្តេចធិបតីនាយករដ្ឋមន្ត្រីនឹងជួបពិភាក្សាជាមួយថ្នាក់ដឹកនាំបារាំង និងប្រទេសផ្សេងទៀត ដើម្បីពង្រឹងទំនាក់ទំនងទ្វេភាគី និងកិច្ចសហប្រតិបត្តិការលើវិស័យផ្សេងៗ។
