ថៃដាក់វិធានការសន្សំថាមពលថ្មី៖ បិទស្ថានីយចាក់សាំងរាល់យប់ និងធ្វើការពីចម្ងាយ

ភ្នំពេញ – នៅពេលដែលវិបត្តិថាមពលកំពុងរាលដាលទូទាំងតំបន់អាស៊ីអាគ្នេយ៍ រដ្ឋាភិបាលថៃបានប្រកាសវិធានការសន្សំថាមពលថ្មីៗដ៏តឹងរ៉ឹង រួមមានការបិទស្ថានីយចាក់សាំងរាល់យប់ និងការអនុញ្ញាតឱ្យមន្ត្រីរាជការធ្វើការពីចម្ងាយ។

យោងតាមការប្រកាសរបស់នាយករដ្ឋមន្ត្រីថៃ លោក អានុទីន ឆានវីរៈគុណ កាលពីថ្ងៃអង្គារ (៧ មេសា) វិធានការថ្មីៗនេះនឹងត្រូវអនុវត្តបន្ទាប់ពីបុណ្យចូលឆ្នាំថៃចប់ ដោយមានការបិទស្ថានីយប្រេងឥន្ធនៈរាល់យប់ចន្លោះម៉ោង ១០ យប់ដល់ ៥ ព្រឹក។

ការកំណត់បិទស្ថានីយចាក់សាំងនេះគ្រោងនឹងចូលជាធរមានចាប់ពីថ្ងៃទី២០ ខែមេសាតទៅ ដោយមិនទាន់អនុវត្តភ្លាមៗ ដើម្បីសម្រួលដល់ការធ្វើដំណើរទៅលេងស្រុករបស់ប្រជាជនថៃក្នុងឱកាសបុណ្យចូលឆ្នាំដែលចាប់ផ្ដើមពីថ្ងៃទី១៣ មេសា។

លោក អានុទីន បានថ្លែងថា៖ «យើងត្រូវតែកែសម្រួលរបៀបរស់នៅរបស់យើងដើម្បីប្រឈមមុខនឹងការពិតនេះ។ ឯកភាពជាតិគឺជាដើមទុនសង្គមដ៏សំខាន់បំផុតរបស់យើងក្នុងគ្រាលំបាកទាំងនេះ»។

វិធានការនេះមានគោលបំណងបង្កើនការរឹតបន្តឹងការប្រើប្រាស់ថាមពលជាតិ នៅពេលដែលជម្លោះនៅមជ្ឈិមបូព៌ានៅតែបន្ត។ ថៃនាំចូលថាមពលប្រហែល ៥០% ពីតំបន់នេះ ដែលធ្វើឱ្យប្រទេសនេះងាយរងផលប៉ះពាល់ពីភាពមិនស្ថិតស្ថេរនៃផ្គត់ផ្គង់ថាមពលសកល។

រដ្ឋាភិបាលថៃកំពុងត្រៀមខ្លួនសម្រាប់ការអូសបន្លាយនៃការចំណាយខ្ពស់លើប្រេងឥន្ធនៈ អគ្គិសនី និងផលិតផលគីមីឥន្ធនៈផ្សេងៗ ដោយសារតម្លៃថាមពលសកលនៅតែមានការប្រែប្រួលខ្លាំង។