By ខេត្តកំពង់ស្ពឺ៖ យុវជនពីរនាក់ដែលម្នាក់ក្នុងចំណោមនោះធ្លាប់ត្រូវបានអាជ្ញាធរអប់រំរួចមកហើយ បានត្រូវឃាត់ខ្លួនជាថ្មីពាក់ព័ន្ធនឹងករណីហិង្សាដោយចេតនា។
មន្ត្រីនគរបាលស្រុកភ្នំស្រួចបានឱ្យដឹងនៅព្រឹកថ្ងៃទី០៨ ខែមេសា ឆ្នាំ២០២៦ ថា កម្លាំងសមត្ថកិច្ចបានឃាត់ខ្លួនយុវជនពីរនាក់ ដែលពាក់ព័ន្ធនឹងករណីហិង្សាដោយចេតនា។ ក្នុងចំណោមជនសង្ស័យទាំងពីរ មានយុវជនម្នាក់ធ្លាប់ត្រូវបានឃាត់ខ្លួនយកមកអប់រំកាលពីខែមុន ពីសកម្មភាពបង្ហោះម៉ូតូបែបទំនើង។
ការឃាត់ខ្លួននេះត្រូវបានអនុវត្តតាមបទបញ្ជារបស់ឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងក្រោមការដឹកនាំផ្ទាល់ពីឧត្ដមសេនីយ៍ត្រី សម សាក់ ស្នងការរងផែនយុត្តិធម៌។ ការប្រតិបត្តិការបានធ្វើឡើងនៅថ្ងៃទី០៧ ខែមេសា ឆ្នាំ២០២៦ នៅភូមិក្រាំងប្រស្រុក ឃុំគីរីវន្ត ស្រុកភ្នំស្រួច។
ជនសង្ស័យទាំងពីរគឺ៖
១. ឡេង សុខជាតិ (ហៅ នុន) អាយុ ១៧ឆ្នាំ រស់នៅភូមិដក់ពរ ឃុំក្រាំងដីវ៉ាយ
២. ស៉ិត សៀងហៃ អាយុ ១៧ឆ្នាំ រស់នៅភូមិដក់ពរ ឃុំក្រាំងដីវ៉ាយ
ករណីហិង្សាដោយចេតនានេះបានកើតឡើងនៅថ្ងៃទី០៥ ខែមេសា ឆ្នាំ២០២៦ នៅវត្តអង្គជុំ ភូមិកណ្ដាល ឃុំតាំងសំរោង។ ចំណែកបក្ខពួកដែលនៅសល់បានគេចខ្លួន ហើយអាជ្ញាធរកំពុងសាងសំណុំរឿងដើម្បីចាត់ការតាមនីតិវិធី។
ជនសង្ស័យ ឡេង សុខជាតិ ធ្លាប់ត្រូវបានអាជ្ញាធរអប់រំរួចមកហើយកាលពីថ្ងៃ១៥ ខែកុម្ភៈ ឆ្នាំ២០២៦ ពីសកម្មភាពបង្ហោះម៉ូតូនៅទីសាធារណៈ ហើយត្រូវបានប្រគល់ទៅអាណាព្យាបាលសម្រាប់ការអប់រំបន្ត។
បច្ចុប្បន្ន ជនសង្ស័យទាំងពីរនាក់ត្រូវបានបញ្ជូនទៅការិយាល័យជំនាញដើម្បីចាត់ការបន្ត។
