សមត្ថកិច្ចចាប់ខ្លួនជនបរទេស២៧នាក់នៅសង្កាត់គោកឃ្លាង ក្នុងប្រតិបត្តិការបង្ក្រាបការឆបោកអនឡាញ

រាជធានីភ្នំពេញ – សមត្ថកិច្ចបានធ្វើប្រតិបត្តិការទ្រង់ទ្រាយធំឆ្មក់ចូលបង្ក្រាបទីតាំងសង្ស័យបង្កប់បទល្មើសបច្ចេកវិទ្យានៅសង្កាត់គោកឃ្លាង ដោយចាប់ខ្លួនជនបរទេសចំនួន២៧នាក់កាលពីយប់ថ្ងៃទី៦មេសា២០២៦។

ប្រតិបត្តិការនេះធ្វើឡើងនៅបុរីហ្គោឌែនឃី ផ្ទះលេខ A01, A02 និង C09 ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ ក្រោមការដឹកនាំពីឯកឧត្តម ឃួង ស្រេង អភិបាលរាជធានីភ្នំពេញ និងឯកឧត្តម ជួន ណារិន្ទ អគ្គស្នងការរងនគរបាលរាជធានីភ្នំពេញ។

ក្រុមសមត្ថកិច្ចបានចាប់ខ្លួនជនជាតិចិន២៦នាក់ (ស្ត្រី១នាក់) និងជនជាតិម៉ាឡេស៊ី១នាក់ សរុប២៧នាក់ ដែលសង្ស័យថាកំពុងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។

ក្រៅពីការចាប់ខ្លួនជនសង្ស័យ សមត្ថកិច្ចបានរកឃើញសម្ភារប្រើប្រាស់ក្នុងការប្រព្រឹត្តបទល្មើសរួមមាន៖ ទូរសព្ទដៃ២២៧គ្រឿង កុំព្យូទ័រយួរដៃ២២គ្រឿង អេក្រង់កុំព្យូទ័រ១៩គ្រឿង និងម៉ាស៊ីនកុំព្យូទ័រ៣គ្រឿង។

លទ្ធផលកោសល្យវិច័យបង្ហាញថា ជនសង្ស័យបានប្រើទីតាំងនេះក្នុងប្រទេសកម្ពុជាដើម្បីឆបោកអ្នករងគ្រោះតាមអនឡាញ ក្រោមរូបភាពជួយទិញទំនិញអនឡាញក្លែងក្លាយ និងទាក់ទាញឱ្យវិនិយោគ។

បច្ចុប្បន្ន ជនសង្ស័យ និងវត្ថុតាងទាំងអស់ត្រូវបានបញ្ជូនទៅកាន់ការិយាល័យជំនាញដើម្បីកសាងសំណុំរឿងបន្តតាមនីតិវិធីច្បាប់។ សមត្ថកិច្ចកំពុងបន្តស្រាវជ្រាវរកបក្សពួកពាក់ព័ន្ធបន្ថែមទៀត។

សម្តេចហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់យ៉ាងច្បាស់ថា កម្ពុជាមិនមែនជាកន្លែងសម្រាប់ឧក្រិដ្ឋជនបច្ចេកវិទ្យាប្រើប្រាស់ក្នុងការប្រព្រឹត្តការឆបោកឡើយ។ រាល់បុគ្គលឬអង្គភាពណាដែលនៅពីក្រោយសកម្មភាពឆបោកទាំងនេះ នឹងត្រូវប្រឈមមុខនឹងទោសទណ្ឌខ្ពស់បំផុត។