By ស្វាយរៀង៖ សមត្ថកិច្ចនគរបាលស្រុកស្វាយជ្រំបានឃាត់ខ្លួនប្តីម្នាក់ដែលវាយប្រពន្ធរហូតដល់ស្លាប់ បន្ទាប់ពីទំនាស់ពាក្យសម្ដីគ្នាយ៉ាងខ្លាំង។
លោកវរសេនីយ៍ឯក សោម សុភ័ណ្ឌ អធិការនគរបាលស្រុកស្វាយជ្រំបានប្រាប់ថា នៅរសៀលថ្ងៃទី៧ មេសា ២០២៦ ម៉ោង ១៥:៥៥ នៅភូមិតារាក់ ឃុំឈើទាល ប៉ុស្តិ៍នគរបាលរដ្ឋបាលឈើទាលបានទទួលព័ត៌មានពីប្រជាពលរដ្ឋអំពីករណីឃាតកម្មដោយប្តីវាយប្រពន្ធខ្លួនឯង។
ក្រោយពីទទួលបទបញ្ជាពីលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្ត និងការសម្របសម្រួលពីលោក ខាំ សុផារី ព្រះរាជអាជ្ញា សមត្ថកិច្ចបានចុះបង្ក្រាប និងឃាត់ខ្លួនជនសង្ស័យ ផេង សារ៉ុន (៦៣ឆ្នាំ) ដែលបានយកដំបងឬស្សីវាយប្រពន្ធឈ្មោះ កង សាមឿន (៦៨ឆ្នាំ) រហូតដល់ស្លាប់។
ក្នុងកិច្ចប្រតិបត្តិការ ជនសង្ស័យបានកាន់ចបជីក និងជំពាមកៅស៊ូបាញ់ ព្រមទាំងមិនសហការ និងវាយតដៃមកលើសមត្ថកិច្ច។ ជនសង្ស័យបានសារភាពថា ខ្លួនពិតជាបានវាយប្រពន្ធរហូតដល់ស្លាប់ដោយសារទំនាស់ពាក្យសម្ដី។
សមត្ថកិច្ចជំនាញ និងក្រុមគ្រូពេទ្យបានពិនិត្យសាកសព និងសន្និដ្ឋានឃើញមានស្នាមរបួសចំក្បាល ស្នាមវាយដំបង បណ្តាលឲ្យផុងប្រេះលលាក្បាល។
សមត្ថកិច្ចបានដកហូតវត្ថុតាងរួមមាន៖ ចបជីក ១, ដំបងដើមឬស្សី ១, ជំពាមកៅស៊ូ ១, គ្រាប់ថ្មគ្រួស ៤គ្រាប់ និងគ្រាប់ខ្លីដី ២គ្រាប់។
បច្ចុប្បន្ន ជនសង្ស័យរួមទាំងវត្ថុតាងកំពុងត្រូវបានកសាងសំណុំរឿងចាត់ការតាមច្បាប់ ចំណែកសាកសពត្រូវបានប្រគល់ជូនក្រុមគ្រួសារដើម្បីធ្វើបុណ្យតាមប្រពៃណី។
