By រាជធានីភ្នំពេញ៖ អតីតតារាសម្តែងដ៏ល្បីឈ្មោះ ដួង ម៉ានិច បានជ្រើសរើសផ្លូវជីវិតថ្មីដោយបន្តកោរសក់បួសជាដូនជី និងប្រតិបត្តិធម៌យ៉ាងខ្ជាប់ខ្ជួន បដិសេធមិនវិលត្រឡប់ទៅកាន់អាជីពសិល្បៈវិញ។
ចាប់តាំងពីសម្រេចចិត្តមានគ្រួសារ អតីតតារាស្រីរូបនេះបានផ្លាស់ប្តូរជីវិតទាំងស្រុង ដោយងាកមករស់នៅតាមបែបស្រែចម្ការជាមួយស្វាមី ចាកឆ្ងាយពីភាពរស់នៅក្នុងទីក្រុង។
អ្វីដែលគួរឱ្យចាប់អារម្មណ៍ជាងនេះទៀត គឺនាងបានលះបង់រូបសម្រស់ដ៏ល្បីល្បាញរបស់ខ្លួន ដោយកោរសក់បួសជាដូនជី និងប្រតិបត្តិធម៌យ៉ាងជាប់លាប់ ខណៈដែលស្វាមីរបស់នាងក៏បានបួសជាព្រះសង្ឃផងដែរ។
នៅលើបណ្តាញសង្គម គេតែងបានឃើញដួង ម៉ានិច បង្ហោះរូបភាពដោយគ្រងសម្លៀកបំពាក់ជាដូនជី កោរសក់ ហើយចូលរួមស្តាប់ធម៌ជាបន្តបន្ទាប់ ដែលពាក្យសម្តីដែលនាងតែងតែសសេរបង្ហោះនោះភាគច្រើនគឺជាធម៌អប់រំចិត្ត។
ដួង ម៉ានិច បានបញ្ជាក់ថា នាងបានកោរសក់បួសជាដូនជីនេះចំនួន៣លើកមកហើយ។ លើកទី១នៅថ្ងៃ១៣.១២.២៥ លើកទី២នៅថ្ងៃ២០.០១.២៦ និងលើកទី៣នៅថ្ងៃទី០២.០២.២៦ កោរខ្លួនឯងនៅថ្ងៃពិធីបុណ្យមាឃបូជា។
នាងបានលើកឡើងថា៖ “ដោយបុញ្ញកម្មនេះ ខ្ញុំសូមបានអត្តភាពជាបុសក្នុងកាលអនាគត ជាអ្នកមានសីល មានបញ្ញាបានបួសក្នុងព្រះពុទ្ធសាសនាផង បានសេបគប់នូវសប្បុរសផង បានស្តាប់នូវធម៌របស់សប្បុរសនោះផង បានដឹងនូវអត្ថសេចក្តីនៃព្រះធម៌នោះផង សូមដល់នូវព្រះនិព្វានដែលមិនមានសេចក្ដីស្លាប់ផង។”
ទោះបីជាធ្លាប់ជាតារាស៊ិចស៊ី និងមានទេពកោសល្យសម្តែងដ៏ល្អ ក៏ដូង ម៉ានិច បានជ្រើសរើសផ្លូវជីវិតថ្មីដោយងាកមកកោរសក់បួសជាដូនជី បដិសេធមិនវិលត្រឡប់ទៅកាន់អាជីពសិល្បៈវិញ ដែលជាការសម្រេចចិត្តដ៏គួរឱ្យគោរព។
